Italııada tym aýyr bolyp ketken ushaqtan jolaýshylardy túsirý qajet boldy

ASTANA. KAZINFORM – Oqıǵa Italııada boldy. Onda London-Sıtı áýejaıyna ushatyn British Airways kompanııasyna tıesili ushaqtan otyndy únemdeý úshin 20 jolaýshynyń túsip qalýy qajet boldy, dep jazady The Sun.

British Airways kompanııasynyń Embraer ERJ-190 ushaǵy bıikke kóterilgende qosymsha qıyndyqtarǵa tap boldy. Sebebi bul ýaqytta Italııadaǵy aýa raıy 35°C ystyq bolyp turǵan. Florentsııadaǵy Amerıgo Vespýchchı áýejaıynyń ushý-qoný jolaǵynyń qysqa bolýy da jaǵdaıdy kúrdelendirdi.

Kýágerdiń aıtýynsha, 11 tamyzdaǵy reıste qozǵaltqyshqa qosymsha otyn qajet bolǵandyqtan jáne aýa temperatýrasynyń joǵary bolýyna baılanysty keıbir jolaýshylar ushaqtan túsýge májbúr bolǵan.

Áýe kompanııasy keltirilgen qolaısyzdyqtar úshin keshirim surady.

— Florentsııa áýejaıynyń qysqa ushý-qoný jolaǵy men aýa temperatýrasynyń joǵary bolýyna baılanysty ushaqtyń salmaǵyn azaıtý qajet boldy. Biz jolaýshylarǵa keltirilgen qolaısyzdyq úshin keshirim ótinemiz. Bizdiń qyzmetkerler adamdardy mejeli jerge barynsha tez jetkizýge tyrysty, — dep habarlady British Airways.

Osyǵan deıin Astanadan Vetnamǵa shyqqan ushaq elordaǵa qaıtýǵa májbúr bolǵany týraly jazdyq.

/