Italııada tennıs dobymen birdeı burshaq jaýyp, 110 adam zardap shekti

RIM. QazAqparat – Italııanyń soltústik-shyǵysyndaǵy Veneto óńirinde kólemi tennıs dobyndaı burshaq jaýyp, 110 adam jaraqat aldy, dep habarlaıdy QazAqparat ANSA-ǵa silteme jasap.

Veneto gýbernatory Lýka Zaııa zardap shekkender burshaqtan nemese synǵan terezelerden jaraqat alǵanyn málimdedi.

«Men qutqarýshylar men tehnıkalyq qyzmetkerlerge rahmet aıtamyn. Olar jaǵdaıdy turaqtandyrý jáne zaqymdy baǵalaý jumysyn jalǵastyryp jatyr, - dep atap ótti Zaııa. - Burshaq erekshe boldy, aspannan dıametri 10 santımetrlik muz tastar jaýdy».

Gýbernator óńirde tótenshe jaǵdaı jarııalady.

Tótenshe jaǵdaılar qyzmeti múliktiń zaqymdanýy men dene jaraqatyna baılanysty 500-den astam adamǵa kómek kórsetken, dep habarlady Veneto aımaqtyq azamattyq qorǵanys qyzmeti.

Jumysshylar qolaısyz aýa raıynda synǵan terezelerdiń áınegin jınap, zaqymdalǵan aǵashtardy kesti.

Bıyl Eýropada aýa raıy qatty qubylyp tur.

Italııa, Ispanııa men Grekııa birneshe kúnnen beri aptap ystyqpen kúresip jatyr.

Italııa astanasy Rımde seısenbi kúni rekordtyq temperatýra – 41 gradýs ystyq tirkeldi.