Italııada taýdan qulaǵan kóshkin poıyzdy relsten shyǵaryp jiberdi
NUR-SULTAN. QazAqparat – Italııanyń soltústiginde laı kóshkini júrip bara jatqan poıyzdy relsten shyǵaryp jiberdi. Bul týraly jergilikti basylymdar jazdy, dep habarlaıdy «QazAqparat» HAA.
Tgcom24 telearnasynyń habarlaýynsha, dúısenbiniń tańynda Fortetstsa qalasynan Brýnıkoǵa bara jatqan poıyz Boltsano provıntsııasynda taýdan qulaǵan laı kóshkininiń ekpininen relsten shyǵyp ketken.
Boltsano provıntsııasy baspasóz jáne baılanys agenttigi Twitter paraqshasynda oqys oqıǵadan eshkim zardap shekpegenin málimdedi. Shuǵyl jetken qutqarýshylar jolaýshylardy qaýipsiz jerge din aman jetkizgen.
Aıta keteıik, qazir Italııanyń soltústiginde aýa raıy qolaısyz bolyp tur. Ótken aptada Trentıno-Alto-Adıdje oblysynda jaýǵan qalyń qar elektr jelileri men kólik baılanysyna aıtarlyqtaı zııan keltirgen. Óńirde temirjol qozǵalysy ýaqytsha toqtatyldy.
