Italııada Skype arqyly jasalǵan neke jaramdy dep tanyldy
ASTANA. QazAqparat - Italııanyń kassatsııalyq soty, ıaǵnı eldegi eń joǵary sot ınstantsııasy ıtalıandyq áıel men pákistandyq er arasynda Skype arqyly jasalǵan nekeni jaramdy dep tanydy, dep habarlady TASS agenttigi.
Osylaısha, sot ınstantsııasy 2012 jyly jas jubaılar nekesin tirkeýden bas tartqan San-Djovannı ın Persıcheto (Bolonıa tóńiregindegi) qalasynyń bıligin odaqty tirkeýge mindettedi.
Sot nekege turýshynyń árqaısysy óz otanynda bolsa da, ekeýiniń de nekege turýǵa nıet bildirgenin esepke aldy. Buǵan deıin «qashyqtyqtan úılenýdi» alǵashqy ınstantsııa men apellıatsııalyq sot ta moıyndaǵan edi.
Bul Italııa kassatsııalyq sotynyń basynan ótken alǵashqy jaǵdaı emes. Máselen, birjynysty juptyń bala asyrap alýy týraly elde naqty zań shyǵarylmasa da, kassatsııalyq sot olardyń quqyǵyn moıyndady.
Sılvıo Berlýskonıdiń (2008-2011) sońǵy úkimeti qabyldaǵan kóshi-qondy baqylaýdy kúsheıtý sharalarynan soń, el aýmaǵyna kelý qujaty joq ózge eldiń azamattary ıtalıandyqtarǵa úılenip, turmysqa shyǵa almaıtyn bolatyn. Al Italııa azamatymen nekege turǵan sheteldik elde ómir súrýge ruqsat ala alady. Osylaısha bılik jalǵan nekemen kúreskisi keldi.
