Italııada sharap qoımasynan 30 myń bótelke urlandy
ASTANA. KAZINFORM — Italııanyń Toskana aımaǵynda belgisiz bireýler 1385 jyldan beri jumys istep kele jatqan áıgili Marchesi Antinori otbasylyq kompanııasynyń sharap qoımasyn tonady, dep habarlaıdy BILD.
Qylmyskerler jalpy quny shamamen 5 mıllıon eýro bolatyn 30 myńǵa jýyq bótelke sharapty alyp ketken. Italııalyq BAQ bul oqıǵany el tarıhyndaǵy «eń iri sharap urlyǵy» dep atady.
Tergeý málimetinshe, ótken senbide keminde jeti betperde kıgen adam Kortona qalasyndaǵy qoımaǵa basyp kirgen. Olar dabyl júıesi men beınebaqylaý kameralaryn óshirip, kásiporynnyń júk tıegishterin paıdalanyp, sharaptardy eki júk kóligine tıegen. Urlyq dúısenbi kúni tańerteń qyzmetkerler jumysqa kelgen kezde ǵana anyqtalǵan.
Urlanǵan sharaptardyń arasynda Solaia, Tignanello jáne Guado al Tasso markalary bar. Barlyq bótelke 2023 jylǵy ónimge jatady. Qylmyskerler, sonyń ishinde Toskanadaǵy eń tanymal ári qymbat sharaptardyń biri sanalatyn Solaia markasynyń shamamen 10 myń bótelkesin alyp ketken.
Sharaptyń bir bótelkesi markasyna qaraı 120–300 eýro turady. Al sırek kezdesetin túrleriniń baǵasy budan da joǵary bolýy múmkin.
Kompanııa basshysy Rentso Kotarellanyń pikirinshe, urlyqtyń artynda basqa sharap zaýyttaryndaǵy osyndaı qylmystarǵa da qatysy bolýy múmkin kásibı qylmystyq top turýy yqtımal. Ol urlanǵan júktiń tabylatynyna úmittenedi. Óıtkeni munsha kóp sharap tıelgen eki júk kóligin eshkimge bildirmeı satý ońaı emes.
Eske sala keteıik, bıyl kóktemde Italııadan Polshaǵa bara jatqan jolda 12 tonna KitKat batonchıgi urlanǵan bolatyn.
