Italııada restorandar men sýpermarketter satylmaı qalǵan azyq-túlikti muqtaj jandarǵa berýge mindetteledi
ASTANA. QazAqparat - Italııada sýpermarketter satylmaı qalǵan azyq-túlikti muqtaj jandarǵa berýge mindetteledi, dep habarlaıdy The Independent.
Bul týraly zań jobasy osy eldiń parlamentiniń tómengi palatasynda qoldaý tapty, jaqyn arada senatqa joldanatyn boldy.
Qazirgi sátte Italııada azyq-túlikti qaıyrymdylyq sharasy aıasynda taratý bylaı júzege asady: aldymen restoran, sýpermarket nemese bar azyq-túlik taratylatyny týraly habarlaý kerek. Jańa zańnamada bul tarmaq alynyp tastaldy. Kerisinshe, neǵurlym kóp qaıyrymdylyq jasasa, soǵurlym qoqysqa tóleıtin salyǵyn azaıtý syndy yntalandyrý tetikteri qarastyrylǵan.
Budan bólek, resmı túrde tutyný merzimi ótip ketken, alaıda paıdalanýǵa áli de jaramdy azyq-túlikterdi jurtqa úlestirýge ruqsat berildi. Osylaısha parlament restoran, sýpermarket jáne barlardyń qojaıyndaryn asty qoqysqa tastamaı, qaıyrymdylyqqa jumsaýǵa shaqyryp otyr.
Eger zań senatta qoldaý tapsa, Italııa Eýropada mundaı qadamǵa barǵan ekinshi el atanady. Birinshi bolyp frantsýzdar osyndaı zań qabyldaǵan edi. Frantsııada restorandar men sýpermarketter qalǵan azyq-túlikti adamdarǵa bergenniń ornyna, ony qoqysqa tastasa, iri kólemde aıyppul tóleıdi.
