Italııada ótetin qysqy Olımpıadada 7 áskerı sportshy synǵa túsedi
ASTANA. KAZINFORM – 6–22 aqpan aralyǵynda Mılanda Qorǵanys mınıstrligi Armııa ortalyq sport klýbynyń áskerı qyzmetshileri qysqy Olımpıada oıyndarynda Qazaqstannyń atynan saıysqa túsedi.
Qorǵanys mınıstrliginiń málimetinshe, Qazaqstan ulttyq quramasynyń qataryna respýblıkalyq jáne halyqaralyq deńgeılerde aıtarlyqtaı jetistikteri bar 7 armııa sportshysy – bıatlonshylar men shańǵyshylar kirdi.
Bıatlon jarysynda efreıtor Vladıslav Kıreev – sprıntte 2025 jylǵy Qysqy Azııa oıyndarynyń chempıony, Azıada-2025 erler estafetasynyń kúmis júldegeri, Azııa chempıonatynyń altyn jáne qola medaldarynyń ıegeri synǵa túsedi. Álem kýbogy maýsymynda ol qazaqstandyq bıatlonshylar arasynda úzdik nátıje kórsetip, kezeńderdiń birinde úzdik 20 sportshynyń qataryna kirgen bolatyn.
Budan ózge el namysyn qorǵaıtyndar sapynda 2025 jylǵy Qysqy Azııa oıyndarynyń kúmis júldegeri, Dúnıejúzilik Ýnıversıadanyń eki dúrkin kúmis júldegeri, halyqaralyq dárejedegi sport sheberi Áset Dúısenov; «Azııa balalary» Halyqaralyq jasóspirimder jarystarynyń qola júldegeri, halyqaralyq dárejedegi sport sheberi Aısha Raqysheva; IBU kýbogy kezeńderiniń birneshe dúrkin qatysýshysy Mılana Geneva da bar.
Ulttyq komanda úshin shańǵy jarystarynda Dúnıejúzilik Ýnıversıadanyń qola júldegeri, 2022 jylǵy Olımpıada oıyndarynyń qatysýshysy, 2025 jylǵy Qysqy Azııa oıyndary estafetasynyń kúmis júldegeri Nadejda Stepashkına; halyqaralyq dárejedegi sport sheberi, 2025 jylǵy Azııa oıyndarynyń kúmis júldegeri, Dúnıejúzilik Ýnıversıadanyń eki dúrkin qola júldegeri, 2022 jylǵy Olımpıada oıyndarynyń qatysýshysy Ksenııa Shalygına; shańǵy jarysy boıynsha Qazaqstan kýbogynyń jeńimpazy, ulttyq jáne halyqaralyq jarystardyń birneshe dúrkin júldegeri Anna Melnık baǵyn synaıdy.
Ásker sportshylarynyń Olımpıada oıyndaryna qatysýy kóp jylǵy tynymsyz ári júıeli eńbekpen kelgen dıyndyqtyń, temirdeı tártip pen kásibı deńgeıdiń joǵary nátıjesi ekeni sózsiz.
Aıta keteıik, buǵan deıin 2026 jylǵy Qysqy Olımpıada oıyndary qandaı sport keshenderinde ótetinin jazǵanbyz.