Italııada órt pen daýyldan bes adam qaza tapty
«Bul – sońǵy onjyldyqtardaǵy eń qıyn kúnderdiń biri», – dep sıpattady jaǵdaıdy Italııanyń Azamattyq qorǵanys mınıstri. Sıtsılııada apta basynda qatty jel men aptap ystyqtan bolǵan órt saldarynan birneshe adam qaza tapty. Palermo áýejaıynyń janyndaǵy Chınızıde órt sóndirýshiler úılerdiń birinen qart erli-zaıyptylardyń kúıip ketken denesin tapty.
Qaıtys bolǵandar arasynda densaýlyǵyna baılanysty jedel járdem shaqyrǵan 88 jastaǵy áıel de bar, biraq dárigerler oǵan jetip úlgermedi. Falkone Borsellıno halyqaralyq áýejaıy birneshe saǵatqa jumysyn toqtatty. Qazir ushatyn reısterdiń shekteýli sanyna ruqsat etilgen. Ushyp keletin reıster úshin aýa raıy jaǵdaıynyń monıtorıngi júrgiziledi. Birinshi jáne úshinshi dárejeli kúıik shalǵan eki ormanshy Palermo azamattyq aýrýhanasynda jatyr.
Araldyń shyǵys bóliginde Taormına qalasy mańyndaǵy kóptegen vılla turǵyny evakýatsııalanyp jatyr. Italııanyń qurlyqtyq bóliginde de jalyn órship tur. Eń qatty zardap shekken Redjo-dı-Kalabrııa provıntsııasy. Onda jalyn kezinde úıinen shyǵa almaı qalǵan 98 jastaǵy er adam kóz jumdy.
San-Kataldo jaǵajaı aımaǵy, Lechche, Apýlııa aımaǵy órtenip jatyr. Al Vıestedegi qonaq úılerden 2 myńǵa jýyq adam evakýatsııalandy. Italııanyń ońtústigi órtenip, tútinge tunshyǵyp jatqanda, eldiń soltústiginde burshaq pen nóser jaýyn jaýyp, qatty daýyl soǵyp jatyr. Breshıa provıntsııasynda jazǵy lagerde demalyp júrgen 16 jastaǵy qyz qaıtys boldy.
Osydan keıin bes aımaqtyń bıligi tótenshe jaǵdaı rejımin engizýge shaqyrdy.
