Italııada narazylyq kezinde polıtseı soqqyǵa jyǵyldy: Melonı oqıǵany qatań aıyptady

ASTANA. KAZINFORM – Italııanyń Týrın qalasynda 31 qańtar kúni Askatasuna áleýmettik ortalyǵyn qoldaýǵa arnalǵan manıfestatsııa jappaı tártipsizdikke ulasyp, polıtsııamen qaqtyǵys boldy. Tártipsizdikter saldarynan 30-dan astam polıtseı jaraqat aldy, birneshe adam qamaýǵa alyndy, dep habarlaıdy agenttiktiń menshikti tilshisi.

Aktsııaǵa Italııanyń ártúrli óńirlerinen, sondaı-aq shetelden, onyń ishinde Frantsııadan 15-20 myńǵa jýyq adam qatysqan.

Narazylyq bildirýshiler Askatasuna áleýmettik ortalyǵy ornalasqan ǵımaratty buzý sheshimine qarsy shyqty. Aımaqtyq basylymdardyń jazýynsha, bul ortalyq eldegi solshyl jáne anarhıstik qozǵalystyń eń kóne ári tanymal oshaqtarynyń biri sanalady.

2025 jylǵy jeltoqsanda Corso Regina Margherita kóshesinde ornalasqan ǵımarat quqyq qorǵaý organdarynyń operatsııasy barysynda bosatylǵan. Reıd kezinde solshyl baǵyttaǵy jergilikti belsendiler shyǵarylǵan.

Senbi kúni ótken sherý bastapqyda beıbit sıpatta ótti. Alaıda keshke qaraı betperde men kaska kıgen radıkaldy top negizgi kolonnadan bólinip, ortalyqtyń burynǵy ǵımaraty men Einaudi ýnıversıtettik kampýsy mańyna bet alǵan.

Narazylyq bildirýshiler polıtsııaǵa petarda, qoldan jasalǵan jarylǵysh zattar, tas pen janǵysh qospasy bar bótelkeler laqtyrǵan. Buǵan jaýap retinde quqyq qorǵaý organdary kózden jas aǵyzatyn gaz, sýatqysh tehnıka qoldanyp, birneshe shuǵyl áreket jasaǵan.

Eń aýyr shabýyl 29 jastaǵy mobıldi polıtsııa qyzmetkeri Alessandro Kalıstaǵa jasalǵan. Ol qorshaýda qalyp, jerge qulatylǵan, judyryqpen, aıaqpen jáne keı derekter boıynsha balǵamen soqqy alǵan. 

Italııanyń vıtse-premer-mınıstri, syrtqy ister mınıstri Antonıo Taıanı polıtseıge shabýyl jasaǵandardy qatań aıyptady.

– Týrınnen taraǵan bul kadrlar meni qatty ashýlandyrdy. Qalaısha bireýge, ásirese qyzmettik mindetin atqaryp júrgen polıtseıge balǵamen shabýyl jasaýǵa bolady? Bular – baı otbasynan shyqqan, buzaqy ári qorqaq jastar. Memleketti jáne onyń ınstıtýttaryn úlken qurbandyqpen qorǵap júrgen barlyq quqyq qorǵaý qyzmetkerlerin qoldaımyn, – dep jazdy ol áleýmettik jelide.

1 aqpan kúngi málimetke sáıkes, keminde 10 adam ustalǵan. Olardyń ekeýi qamaýǵa alynǵan, úsheýi (onyń ishinde jas áıelder de bar) aıyp taǵylyp, elden shyqpaý týraly qolhatpen bosatylǵan. Jaraqat alǵan polıtseılerdiń jalpy sany – 31.

Italııa premer-mınıstri Djordja Melonı oqıǵany qatań aıyptap, «Bul – narazylyq ta, pikir bildirý de emes, memleketke qarsy baǵyttalǵan ashyq agressııa» dep málimdedi.

1 aqpanda ol Týrın qalasyna baryp, polıtsııa qyzmetkerlerimen kezdesti jáne Molinette aýrýhanasynda jaralanǵan Alessandro Kalıstanyń jaǵdaıyn jeke ózi baryp kórdi. Italııa prezıdenti Serdjo Mattarella ishki ister mınıstri Matteo Pıantedozıge qoldaý bildirdi.

Aıta keteıik, Italııa kýrortyndaǵy aspaly jolda apat bolyp, týrısterdi tikushaqpen evakýatsııalady.