Italııada Muhtar Ábilázovti izdep-tabý boıynsha shuǵyl sharalar ótkizilýde - QR Bas prokýrory
Bul týraly búgin jýrnalısterge QR Bas prokýrory Ashat Daýylbaev málim etti.
"Búgingi tańda Italııanyń quqyq qorǵaý organdary Ábilázovti jáne ózge de jasyrynyp júrgen tulǵalardy izdestirý jáne ustaý boıynsha jedel-izdestirý is-sharasyn júrgizýde. Eger biz olardyń ornalasqan jerlerin anyqtaıtyn bolsaq, onda olardy ustap, QR aýmaǵyna jiberý boıynsha barlyq qajetti sharalardy atqaratyn bolamyz. Máselen, birer kúnder buryn Ispanııa jerinde Aleksandr Pavlov ustalǵan bolatyn. Ol QR aýmaǵynda aýyr ekonomıkalyq qylmystar jasady jáne elimizde lańkestik aktilerdi uıymdastyrmaq boldy dep aıyptalýda", - dedi A.Daýylbaev.
Eske sala keteıik, Muhtar Ábilázov BTA banki salymshylarynyń mıllıardtaǵan qarjysyn jymqyryp, Eýropaǵa qashyp ketken bolatyn. Onyń eldi tastap ketýine Ábilázovtiń kúzetshisi A. Pavlov kómektesken jáne olar Qazaqstanda birneshe lańkestik aktini uıymdastyrýdy josparlaǵan. Muhtar Áblázovtiń bankten urlaǵan aqshasy 83 mıllıard teńgeni quraıdy. Aqshany jymqyrý úshin 9 jalǵan seriktestik qurylǵan, bul ister 2005 jyldan bastaldy.
Qazir vedomstvoaralyq tergeý toby «Interpol» sııaqty ózge elderdiń quqyq qorǵaý organdarymen kúdiktilerdi izdestirip jatyr. Muhtar Ábilázovtiń qarajatty zańsyz ıelený áreketterine qatysty Reseı men Ýkraınanyń quqyq qorǵaý organdary da qylmystyq is qozǵady.
Ábilázovtiń menshigindegi 136 jer telimi, 924 páteri, 3 ushaǵy men 83 avtokóligi de sol sottyń sheshiminen keıin «BTA Bankine» qaıtarylýy múmkin.
