Italııada muǵalimderdiń 70%-ynyń jasy 50-den asqan
ASTANA. QazAqparat - Ekonomıkalyq yntymaqtastyq pen damý uıymyna múshe 35 eldiń arasynda Italııa egde jastaǵy muǵalimder sany jaǵynan alda keledi. Bul týraly uıymnyń jylda jarııalanatyn baıandamasynda keltirilgen, dep jazady «Habar 24».
Italııa mektepterindegi ustazdardyń 70%-ynyń jasy 50-den asqan. Olardyń kóbi - áıelder. Bilim berý júıesi úshin muǵalimderdiń jasy úlken másele bolyp tur. Jas ustazdarǵa jumys orny jetispeıdi.
Bul ózge mamandyqtarǵa da qatysty. Jalpy, Italııa Eýropadaǵy eń kári el sanalady. Turǵyndarynyń 20%-y, ıaǵnı 13 mln adam 65 jastan asqan. Halyqtyń qartaıýy osydan 30 jyl buryn bastalyp, eldegi egde jastaǵylardyń sany ósip keledi.
«Búginde halyqtyń 20%-y 65 jastan asqan. 20-30 jyl buryn bul úles eki ese az bolatyn. Elimizdiń qartaıýy jalǵasyp, ondaǵan jyl ótkennen keıin egde jastaǵylardyń sany 30%-dan asyp ketedi», - deıdi Demografııa men áleýmettik saıasatty zertteý ınstıtýtynyń dırektory Korrado Bonıfatsı.
