Italııada mıgranttyń qazasynan keıin jappaı tártipsizdikter bastaldy
ASTANA. KAZINFORM – Italııanyń Bolonıa qalasynda marokkolyq mıgrant Abderrahım Fakır polıtsııa ustaý kezinde qaza tapty. Osyǵan baılanysty oryn alǵan tártipsizdikter kezinde ondaǵan polıtsııa qyzmetkeri jaraqat aldy, dep habarlaıdy BBC.
42 jastaǵy Abderrahım Fakır jeksenbi kúni tańerteń kóz jumǵan. Italııa baspasóziniń málimetinshe, onyń otbasy elge 30 jyldan astam ýaqyt buryn qonys aýdarǵan.
Oqıǵa aldynda Fakırdiń kórshisi polıtsııaǵa habarlasyp, onyń ózin agressıvti ustap, garajdy (keıbir derekterde avtokólikti) tepkilep jatqanyn aıtqan. Oqıǵa ornyna kelgen polıtseıler aldymen buryshty gaz, keıin kúsh qoldanǵan.
Áleýmettik jelilerde taraǵan vıdeoda eki polıtsııa qyzmetkeriniń jerde etpetinen jatqan Fakırge kisen salýǵa áreket jasap jatqany, al onyń kómek suraǵany kórinedi. Birneshe mınýttan keıin polıtseılerdiń biri onyń qozǵalyssyz jatqanyn baıqap, esin tekserýge tyrysqan.
Bolonıa qalasynyń meri Matteo Lepore turǵyndardy marqumdy eske alýǵa arnalǵan beıbit mıtıngige shaqyrdy. Sharaǵa Fakırdiń jıeni Iossra Fakır de qatysty.
– Ol meniń aǵam edi. Ol jaı ǵana statıstıka nemese jańalyqtaǵy bir jol emes. Ony jaqsy kóretin adamdar boldy. Ol tyńdalýǵa, kómek alýǵa jáne adamdyq qadir-qasıetiniń qurmettelýine laıyq edi, – dedi Iossra Fakır.
Sherýge birneshe myń adam jınaldy. Bastapqyda aktsııa beıbit ótkenimen, keıin shamamen júzge jýyq adam polıtsııamen qaqtyǵysqa shyqty. Olar tártip saqshylaryna bótelke, pırotehnıkalyq zattar men oryndyqtar laqtyryp, eki avtokólikti órtep jiberdi.
Polıtsııa kásipodaǵynyń málimetinshe, tártipsizdikter kezinde 56 polıtsııa qyzmetkeri zardap shekken. Keıin prokýratýra jaralanǵandardyń sany 64 adamǵa jetkenin habarlady.
Bolonıa meri zorlyq-zombylyqqa zorlyqpen jaýap berýge bolmaıtynyn málimdedi.
Italııa prokýratýrasy abaısyzda adam óltirý faktisi boıynsha qylmystyq is qozǵap, polıtsııa qyzmetkerleri men jedel járdem mamandarynyń áreketteriniń zańdylyǵyn tekserip jatyr. Oqıǵadan keıin polıtseılerdiń barlyǵy qyzmettik beınekameralaryn tergeýshilerge tapsyrǵan.
Italııa premer-mınıstri Djordja Melonı Abderrahım Fakırdiń ólimi jan-jaqty ári beıtarap tergeletinin málimdep, tártipsizdik uıymdastyrǵandardy qatań aıyptady.
– Bul oqıǵany qalany qıratýǵa, polıtsııaǵa shabýyl jasaýǵa jáne zorlyq-zombylyqty órshitýge sebep retinde paıdalanǵandar shyndyqty izdegen joq. Olar tek qaqtyǵysty kózdedi, – dedi Djordja Melonı.
Aıta keteıik, Italııada morokkolyq azamat kólikpen bir top adamdy soqty, zardap shekkender bar.
