Italııada metro ekskalatory isten shyǵyp, 30-ǵa jýyq adam zardap shekti
RIM. QazAqparat - Rım qalasynyń metrosynda eskalatordyń isten shyǵýynan 30-ǵa jýyq adam zardap shekti. Olardyń jeteýi aýyr jaǵdaıda, dep habarlaıdy QazAqparat TASS agenttigine silteme jasap.
Reseıdiń Italııadaǵy elshiliginen málim etkendeı, zardap shekkenderdiń arasynda máskeýlik TsSKA fýtbol klýbynyń jankúıerleri bar.
«Barlyǵy 30 adam jaraqattandy: jeteýi aýyr jaǵdaıda, taǵy bes adamnyń densaýlyǵy «ortasha aýyr» dep baǵalanýda, 18-i jeńil jaraqattar alǵan»,- dedi agenttiktiń derekkózi.
«Repubblica» ortalyq metro stansysynda oqıǵa bolǵan ýaqytta TsSKA-«Roma» matchyn tamashalaý úshin Olımpıadalyq stadıonǵa bara jatqan Reseı Federatsııasynyń azamattary da bolǵan.
Oqıǵa kýágerleriniń aıtýynsha, Olımpıadalyq stadıonǵa jetý úshin birqatar reseılik jankúıer metroǵa túsken. Kenetten eskalator jyldam qozǵala bastaǵan. Jolaýshylar túsip úlgermeı, biriniń ústine biri qulaı bastaǵan. Olardyń biri aıaǵynan aıyrylǵan.
Metro alańyna polıtsııa qyzmetkerleri, qutqarý qyzmetteriniń kólikteri dereý jetken. Kem degende bes jedel járdem kóligi oqıǵa ornynan adamdardy alyp ketti. Jańa brıgadalar kelýde. Metro stansysy jabyldy.
TASS agenttigine Rımdegi Olımpıadalyq stadıonnan málim etkendeı, saǵat 22.00-de bastalatyn fýtbol matchyna 1,5 myń reseılik jankúıer keletini kútilýde.
