Italııada maska rejımin buzǵandarǵa salynatyn aıyppul mólsheri 1 myń eýroǵa deıin artty
BRıÝSSELЬ. QazAqparat – Italııanyń ońtústik-batysynda ornalasqan Kampanııa aımaǵynda maska taǵý týraly talapty saqtamaǵan tulǵalar men bıznes ókilderine salynatyn aıyppul 1 myń eýroǵa deıin artty, dep habarlaıdy QazAqparat The Local-ǵa silteme jasap.
Salerno qalasyndaǵy bar men shashtaraz sekildi úsh mekemege jeksenbi kúni birinshi bolyp aıyppul salyndy. Olar juma kúni qabyldanǵan maskany jabyq mekemelerde taǵýdy talap etetin jarlyqty oryndamaǵany belgili boldy.
Jarlyqtyń negizgi sharalarynyń biri – jabyq mekemelerde, qoǵamdyq oryndarda, sýpermarketterde, barlarda, meıramhanalarda, dúkender men qoǵamdyq kólikte maska taqpaǵandarǵa 1 myń eýro mólsherinde aıyppul salý.
Erejege sáıkes, kólik operatorlary maska taqpaǵan jolaýshylardy kirgizýge tyıym salýǵa mindetti. Eger mundaı jolaýshylar kólikke minse, olarǵa aıyppul salynýy jáne kólikten túsirilýi tıis. Eger olar odan bas tartsa, «avtobýs nemese poezd toqtaıdy» jáne «polıtsııanyń shaqyrylady». Eger quqyq buzýshylyq kommertsııalyq qyzmetti júzege asyrý kezinde jasalsa, kásiporyndar da jaýapqa tartylady.
1 myń eýro aıyppuldan bólek, bıznes 5-ten 30 kúnge deıingi merzimge jabylýy múmkin.
Italııa – koronavırýstan qatty zardap shekken Eýropadaǵy alǵashqy el. Munda aýrý juqtyrǵan 242 000–nan astam jaǵdaı tirkelgen, 35 myńnan astam adam qaıtys bolǵan.
Ótken senbide elde koronavırýsqa shaldyǵýdyń 275 jańa deregi, bes ólim jaǵdaıy tirkeldi.
