Italııada mádenı oıyn-saýyq oryndaryna kirý úshin Covid ruqsatnama qajet

RIM. QazAqparat – Italııada koronvırýstyń Delta nusqasynyń taralýymen baılanysty Covid-19-yń tórtinshi tolqyny bastaldy. Sol sebepti 6 tamyz, jumadan bastap azamattar mádenı jáne oıyn-saýyq oryndaryna barý úshin «green pass» Covid-ruqsatnamasyn kórsetý kerek bolady, dep habarlaıdy QazAqparat The Local saıtyna silteme jasap.

Certificazione verde nemese Covid sertıfıkaty koronavırýsqa qarsy tolyq vaktsına alǵandarǵa nemese sońǵy alty aı ishinde vırýspen aýyrǵandarǵa, sonymen qatar sońǵy 48 saǵat ishinde koronavırýsqa test tapsyryp, teris nátıje kórsetkenderge beriledi.

6 tamyzdan bastap Italııanyń kóptegen kásiporyndary men mádenı nysandary zań boıynsha kirer kezde sertıfıkat talap etýi kerek.

Sertıfıkat 12 jastan asqan adamdarǵa murajaılarǵa, galereıalarǵa, teatrlarǵa, kınoteatrlarǵa, sport stadıondaryna, taqyryptyq saıabaqtarǵa, jabyq basseınderge, spa-ǵa, sportzaldarǵa jáne barlar men meıramhanalardaǵy ashyq demalys oryndaryna barǵan kezde qajet.

Osy talapty buzǵany úshin klıentter de, kásiporyndar da 400-1 000 eýro kóleminde aıyppul tóleıdi.

Italııa úkimeti qonaqúılerge, sýpermarketterge nemese saýda ortalyqtaryna kirý kezinde sertıfıkat kórsetýge qatysty basqa josparlar týraly habarlaǵan joq.

Sonymen qatar el bıligi ishki saparlar jasaıtyn qoǵamdyq kólikterde, alys jerlerge baǵyt alatyn poıyzdarda, mektepter men jumys oryndarynda Covid-sertıfıkatyn engizý týraly máseleni qarastyryp jatyr.

EO jáne Shengen aımaǵynan, AQSh-tan, Kanada pen Japonııadan kelgen týrıster Italııanyń sertıfıkat talap etiletin jerlerine óz elinde berilgen uqsas medıtsınalyq qujattardy kórsetý arqyly bara alady.

Italııa úkimeti Ulybrıtanııa men Izraıl turǵyndaryna berilgen uqsas medıtsınalyq qujattardy moıyndaıtynyn málimdedi.