Italııada koronavırýstyń kesirinen ókpesinen aıyrylǵan jigitke «jańa» ókpe salyndy
MILAN. ANSA – QazAqparat – Italııada COVID-19 saldarynan tynys alý organynan aıyrylǵan 18 jastaǵy jigittiń ókpesi aýystyryldy, dep habarlaıdy QazAqparat ANSA-ǵa silteme jasap.
Bul – Eýropada jasalǵan osyndaı alǵashqy ota. Operatsııa Mılandaǵy aýrýhanada jasaldy.
Franchesko esimdi jigitte 2 naýryzda koronavırýs ınfektsııasynyń belgileri paıda bolǵan, 6 naýryzda ol Mılandaǵy San-Raffaele aýrýhanasynyń jansaqtaý bólimine jatqyzyldy. 23 naýryzda jasandy qan aınalymy qurylǵysyna qosyldy.
Soǵan qaramastan, koronavırýs ınfektsııasynyń aýyr túrine shaldyqqandyqtan onyń ókpesi istemeı qaldy. Sáýirdiń ortasynda San-Raffaele dárigerleri naýqastyń ókpesin aýystyrý týraly sheshim qabyldady.
Buǵan deıin osyndaı operatsııa tek Qytaıda jasalyp kelgen. Biraq, Mılandaǵy ókpe transplantatsııasynan keıin birneshe kún ótken soń mundaı ota Venada da jasaldy.
Memlekettik ýnıversıtettiń kókirek qýysy hırýrgııasy mektebiniń basshysy Marıo Nozottıdiń aıtýynsha, operatsııa kúrdeli bolǵan. Endi jas jigit uzaq ýaqyt ońaltýdan ótedi.
