Italııada koronavırýstan jetinshi adam qaıtys boldy
RIM. QazAqparat – Italııada dúısenbi kúngi málimet boıynsha koronavırýstan qaıtys bolǵandar sany 7 adamǵa jetti, dep habarlaıdy QazAqparat dw.com saıtyna silteme jasap.
Olardyń beseýi bir táýlikte kóz jumǵan. Eldiń soltústiginde COVID-19 vırýsyn juqtyrdy dep 220 adamǵa dıagnoz qoıyldy. Olardyń kópshiligi – Lombardııa men Venetoda.
Bılik soltústik Italııadaǵy barlyq mektep, ýnıversıtet, murajaı men kınoteatrlardy keminde bir aptaǵa japty, sondaı-aq buqaralyq sharalarǵa, onyń ishinde tanymal Venetsııa karnavalyna toqtatyldy. Meıramhanalar jabyq, kóptegen kompanııalar qyzmetkerlerine úıden jumys isteýge ruqsat berdi. Jalpy alǵanda 50 myńnan astam adam turatyn 11 eldi meken vırýstyń taralý qaýpine baılanysty karantınge jabyldy. Bılik osy sharalar bir apta ishinde ınfektsııanyń taralýyn toqtatý úshin jetkilikti bolady dep úmittenedi.
Italııada kólemi boıynsha ekinshi qala, qarjy astanasy 1,3 mıllıon adam turatyn Mılanda qalanyń bas gotıkalyq shirkeýi jabyldy, «La Skala» opera teatrynda qoıylymdar toqtatyldy, A serııaly fýtbol chempıonatynyń matchtary keıinge shegerildi.
Italııanyń týrıst ındýstrııasy aıtarlyqtaı shyǵynǵa ushyraıdy. Sarapshylar eldiń ónerkásiptik aýdandarynda koronavırýstyń órshýine baılanysty Italııa ekonomıkasyna retsessııa qaýip tóndirýi múmkin dep eskertti. Italııa qor naryǵy dúısenbi kúni shamamen 5%-ǵa tómendedi.
Eske sala ketsek, dúısenbi kúni Lombarıdııa gýbernatory Attılıo Fontana koronavırýstan besinshi qurban 84 jastaǵy qarııanyń aýrýhanada kóz jumǵanyn rastady.
