Italııada koronavırýstan qaıtys bolǵandardy bir mınýt únsizdikpen eske aldy
RIM. ANSA-QazAqparat – Seısenbi kúni Italııada koronavırýs ınfektsııasynan taǵy úsh dáriger kóz jumdy, dep habarlaıdy QazAqparat ANSA agenttigine silteme jasap.
Messındegi jalpy dáriger Gaetana Trımarchı, Komo mańynda ornalasqan Serenodaǵy kardıolog Norman Djons jáne Rımde jumys istegen gınekolog Roberto Mıletı koronavırýs ınfektsııasynan qaıtys boldy, dep habarlady FNOMCEO Dárigerler Gıldııasy federatsııasy.
Osylaısha, COVID-19 jańa vırýsynan kóz jumǵan dárigerlerdiń jalpy sany 66-ǵa jetti. ANSA agenttiginiń habarlaýynsha, búgin Italııanyń barlyq aımaǵynda medıtsına qyzmetkerlerin qoldaý úshin, sondaı-aq olardyń otbasy men jaqyn adamdaryna qoldaý bildirý úshin koronavırýs qurbandaryn bir mınýt únsizdikpen eske alý kezinde týlar túsirildi.
Italııa merleri usynǵan bastamany mekemeler, ulttyq jáne jergilikti bılik organdary, sondaı-aq ANSA-ny qosa alǵanda, isker toptar men aqparattyq agenttikter qoldady.
Eske sala keteıik, sońǵy málimet boıysha COVID-19 vırýsynan Italııada 11 500 adam kóz jumǵan.
