Italııada koronavırýstan qaıtys bolǵandar sany Qytaıdan asyp ketti
Sońǵy táýlikte Italııada atalmysh dertten 427 adam qaıtys bolǵan. Sóıtip aýrý órshigennen beri elde kóz jumǵandar sany 3405 boldy. Bul Qytaıda qaza tapqandar sanynan 150 adamǵa kóp. Jalpy alǵanda, Italııada 41 myń adam vırýs juqtyrǵan. Sońǵy 24 saǵat ishinde 5322 adamnan vırýs tabylǵan.
Qytaı sarapshy dárigerleriniń sózinshe, Italııa bıliginiń COVID-19 indetimen kúreske jumsaǵan kúsh-jigeri jetkiliksiz.
«Menińshe, Mılanda qatań karantın sharalary da kómektespeı jatyr. Qoǵamdyq kólik áli jumys istep tur, halyq qalada emin-erkin júr. Qonaq úıde túrli keshter uıymdastyrylady. Sosyn sizder maska kımeısizder», - deıdi Qytaıdaǵy Qyzyl jarty aı uıymynyń ókili Sýn Shýopen.
Italııa halqy eki aptadan beri oqshaýlanyp ómir súrip jatyr. Bastapqyda karantın 3 sáýirge deıin dep josparlanǵan. Degenmen ol áli uzartylady. Onyń ústine, úkimet taǵy da qosymsha sharalar engizýge nıetti. Atap aıtqanda, halyqtyń taza aýada júrip-turýyna shekteý qoıylady.
Sonymen qatar, azyq-túlik dúkenderiniń demalys kúnderdegi jumys ýaqyty qysqarmaq. Memlekettik organdardyń kóbisi qashyqtan jumys isteýge kóship jatyr. Jumys istep turǵan bankter men poshtalarda qyzmetkerler sany azaıýda.