Italııada koronavırýstan alǵashqy adam qaıtys boldy
RIM. QazAqparat – Koronavırýs juqtyrǵan egde jastaǵy Padýı azamaty qaıtys boldy, dep habarlaıdy QazAqparat DW-ge silteme jasap.
Jańa ınfektsııa paıda bolǵannan keıin Italııa bıligi mektepter, qoǵamdyq mekemeler men meıramhanalardy jabýǵa buıryq berdi.
Koronavırýs juqtyrǵan Italııa turǵyny juma kúni qaza taýyp, Qytaıda paıda bolǵan jańa koronavırýstyń alǵashqy eýropalyq qurbany boldy.
Italııanyń densaýlyq saqtaý mınıstri Roberto Sperantstyń juma kúngi málimdemesi boıynsha, qart adam Padýıa qalasyndaǵy emhanada qaıtys bolǵan. Onyń aıtýynsha, 78 jastaǵy naýqas aýrýhanada 10 kún jatty.
Qurban bolǵan azamat Veneto aýdanynda koronavırýsqa jasalǵan test oń nátıje kórsetken eki adamnyń bireýi.
Taǵy 15 adamnyń koronavırýs juqtyrǵany belgili bolǵannan keıin Italııanyń soltústigindegi 10 qaladaǵy mektepter, qoǵamdyq mekemeler men meıramhanalardy jabýǵa buıryq bergen bolatyn.
Barlyq jaǵdaı Lombardııa aýdanynda tirkeldi. Onda 38 jastaǵy azamat qańtardyń sońynda Qytaıdan oralǵan adammen kezdeskennen keıin vırýs juqtyrǵan. Ol em alǵan Kodono qalasyndaǵy emhanada bes dáriger, medbıke men birneshe emdelýshi indet juqtyrdy.
Lombardııa aýdanynda bir dámhanaǵa barǵan taǵy úsh adamnyń test qorytyndysy oń nátıje kórsetti.
Italııa sheneýnikteriniń aıtýynsha, júzdegen adam oqshaýlandyrylyp, vırýsqa tekseristen ótip jatyr. Іndet juqtyrǵan er adamnyń 150-den astam áriptesi men Kodono emhanasyndaǵy 70 medıtsına qyzmetkeri medıtsınalyq tekseristen ótip jatqandar qatarynda.
Osylaısha, Italııada qaýipti vırýs juqtyrǵandardyń jalpy sany 17-ge jetti.
