Italııada koronavırýsqa qarsy vaktsına alǵash ret adamǵa egildi

RIM. ANSA-QazAqparat – Italııada koronavırýsqa qarsy vaktsına adamdarǵa egilip, synaqtan ótkizilýde, dep habarlaıdy QazAqparat ANSA agenttigine silteme jasap.

Italııada alǵash ret erikti áıelge Rım qalasynyń ınfektsııalyq aýrýhanasynda koronavırýsqa qarsy ekpe egildi.

Erikti áıel qaýipti vırýsqa qarsy vaktsına alǵan eldegi alǵashqy adam ekendigine maqtanatyndyǵyn jetkizgen.

Vaktsınany Italııanyń bıotehnologııalyq fırmasy shyǵarǵan.

«Búgin zertteýdiń jańa tarıhı kezeńi bastaldy jáne bul jobanyń ilgerleýine memleket qarjylaı kómek kórsetti», - dedi Latsıo gýbernatory Nıkola Zıngarettı.

Zertteý ótkizilip jatqan ınfektsııalyq aýrýhananyń dárigerleri vaktsına kelesi jyldyń kókteminde paıdalanýǵa daıyn bolady deıdi.

Al Italııanyń Densaýlyq saqtaý mınıstri Roberto Sperants ǵalymdar alǵa qoıylǵan mindetti oryndaı aldy degen pikir bildirdi.

Eske salsaq, maýsym aıynda Nıderlandy, Italııa, Germanııa jáne Frantsııa koronavırýstan vaktsına jasaý úshin alıans qurdy.