Italııada qysqy Paralımpıada oıyndarynyń ashylý saltanaty ótti
ASTANA. KAZINFORM — XIV qysqy Paralımpıada oıyndarynyń ashylý saltanaty Italııanyń Verona qalasynda ótti. Mılan-Kortına-2026 qysqy Paralımpıada oıyndaryna 56 elden 600-den asa sportshy qatysady. Bul týraly Týrızm jáne sport mınıstrligi málim etti.
Qysqy Paralımpıada oıyndarynda Qazaqstan ulttyq quramasy para shańǵy jarysy men para bıatlon sport túrleri boıynsha el namysyn qorǵaıdy.
Atap aıtsaq, para bıatlon men para shańǵy jarysynan: Erbol Hamıtov, Aleksandr Gerlıts, Sergeı Ýsoltsev jáne ıÝrıı Berezın, al para shańǵy jarysynan — Nýrlan Alımov, Vladıslav Kobal jáne Anna Gracheva.
— Bul oıyndar — bizdiń quramamyz úshin óz sheberligin dáleldep, el namysyn abyroımen qorǵaýǵa berilgen taǵy bir mańyzdy múmkindik. Qazaqstan ulttyq quramasynyń árbir sportshysy osy dodaǵa uzaq ári kúrdeli daıyndyq arqyly keldi. Olar kún saıyn eńbek etip, óz múmkindikterin dáleldeýge tyrysty. Erteń sportshylarymyz úshin alǵashqy jarys kúni. Barsha qazaqstandyqtardy ulttyq quramamyzǵa jankúıer bolýǵa shaqyramyn. Bizdiń sportshylarymyzǵa sáttilik, ádil jarys jáne jarqyn jeńister tileımin, — dedi Týrızm jáne sport vıtse-mınıstri Serik Jarasbaev.
Aıta keteıik, Mılan-Kortına-2026 XIV qysqy Paralımpıada oıyndary 6-15 naýryz aralyǵynda ótedi. Dúbirli dodada para shańǵy jarysy, para bıatlon, arbadaǵy kerlıng, para snoýbord, taý shańǵysy jáne para hokkeı sport túrleri boıynsha 79 medal jıyntyǵyn sarapqa salady.
Paralımpıada oıyndarynda ulttyq qurama 7-shi naýryz kúni para bıatlonnan 7,5 km qashyqtyqtaǵy sprınttik jarys boıynsha synǵa túsedi. Jarys jolynda Erbol Hamıtov, Aleksandr Gerlıts, Sergeı Ýsoltsev jáne ıÝrıı Berezın óner kórsetedi.
Ulttyq qurama qatysatyn jarystyń tikeleı efıri Qazsport telearnasynyń efırinde kórsetiledi.
Eske sala keteıik, buǵan deıin qysqy Paralımpıada-2026 ótpeı qalýy múmkin be degen máseleni qozǵaǵan edik.