Italııada qylmyskerler brıtandyq lordtyń qolynan 175 myń fýnt sterlıng turatyn saǵatty julyp áketti
ASTANA. KAZINFORM — Italııanyń Kaprı aralynda demalyp júrgen 65 jastaǵy Lord Ara Darzı qaraqshylyq shabýylǵa ushyrap, qolynan quny 175 myń fýnt sterlıngten asatyn Richard Mille markaly saǵatty julyp áketken. Bul týraly The Telegraph basylymy habarlady.
Ulybrıtanııanyń burynǵy densaýlyq saqtaý mınıstri ári belgili hırýrg Ara Darzı dostarymen birge araldyń ortalyq alańynan shyǵyp kele jatqan kezde eki adam oǵan kenetten shabýyl jasaǵan.
Italııa polıtsııasynyń málimetinshe, qaraqshylar lordtyń qolynan lıýks sanatyndaǵy qymbat saǵatty julyp alyp, oqıǵa ornynan dereý qashyp ketken. Aldyn ala málimet boıynsha, Lord Darzı dene jaraqatyn almaǵan.
Qazirgi ýaqytta quqyq qorǵaý organdary beınebaqylaý kameralaryndaǵy jazbalardy zerttep jatyr. Kúdikti eki adamnyń beınesi jarııalanǵan.
Atalǵan oqıǵa Kaprı aralyndaǵy qaýipsizdik máselesine qatysty alańdaýshylyq týyndatýda. Sebebi aral — jaz mezgilinde álemniń túkpir-túkpirinen keletin tanymal jáne aýqatty adamdardyń súıikti demalys orny sanalady.
Kaprı meri Paolo Falko The Telegraph basylymyna túsinikteme berýden bas tartty. Alaıda La Repubblica gazetine bergen suhbatynda araldyń qaýipsizdigine senimdi ekenin aıtty.
– Bul oqıǵa — aral úshin erekshe jaǵdaı. Kaprı árdaıym qaýipsiz ári qonaqjaı meken bolǵan. Atalǵan qylmys aldyn ala josparlanǵan bolýy múmkin. Qaýipsizdik sharalaryn kúsheıtemiz, ásirese týrıster kóp shoǵyrlanatyn ortalyq aýdandarda, – dedi ol.
Aıta keteıik, buǵan deıin Qazaqstanda jalpy bastapqy quny 352,3 mln teńge bolatyn qymbat qolsaǵattardy satý boıynsha aýktsıon ótetini habarlanǵan bolatyn.