Italııada keme aýdarylyp, 50 adam ajal qushty
ASTANA. 12 qazan. QazAqparat - Keshe keshke Italııanyń Lampedýza aralynyń jaǵalaýynda bortynda 200-den astam mıgranty bar keme aýdaryldy. Ázirge 120 adam qutqaryldy, 50 adamnyń múrdesi tabyldy. Qutqarý operatsııasy jalǵasýda, dep habarlaıdy Bı-Bı-Sıdiń reseılik qyzmeti.
Italııa shuǵyl qyzmetteri qutqarý operatsııasyn júrgizýde. Italııa men Maltanyń kemeleri de zardap shekkenderdi jumyla izdestirýde. Keminde 120 adam jaǵalaýǵa jetkizildi.
ANSA Italııa agenttigi shamamen 50 adam qaza boldy dep habarlaıdy, alaıda bul aqparat resmı túrde rastalǵan joq.
Keme bortyndaǵy mıgranttardyń qaı ulttan bolǵany ázirge belgisiz.
Afrıka jaǵalaýynan 290 shaqyrym qashyqtyqta ornalasqan Lampedýza araly - Eýropaǵa ótkisi keletin zańsyz mıgranttardyń tartylatyn negizgi orny.
Ótken aptada beısenbi kúni Lampedýza jaǵalaýynan bortynda 500-ge jýyq adamy bar taǵy bir keme sýǵa batyp ketken bolatyn. Olardyń 155-i ǵana qutqaryldy.
Qala turǵyndary kópten beri EO jáne Italııa bıligi araldan túsip qalatyn myńdaǵan mıgranttardy qabyldaýdy uıymdastyrý jóninde qajetti sharalardy qolǵa alýǵa qulyqsyz ekenine shaǵymdanýda.
