Italııada qala ákimin sholaq shalbary úshin meıramhanadan shyǵaryp jiberdi
ASTANA. QazAqparat - Italııanyń soltústigindegi jaǵalaý meıramhanalarynyń biriniń daıashysy jergilikti qala ákiminen keshki as ishýge sholaq shalbarmen kelgeni úshin mekemeden shyǵyp ketýin talap etken, dep habarlaıdy Bı-Bı-Sı agenttigi.
Vıaredjo kýrorttyq qalasy ákimdiginiń basshysy Djordjo del Gıngaro Feısbýktegi paraqshasynda yńǵaısyz jaǵdaı týraly, meıramhana dress-kody týraly eskertilmegendigin baıandap, sholaq shalbarmen túsken sýretin jarııalady.
«Bul beıresmı keshki as bolatyn, jaqyn dostarymmen qarapaıym kezdesý bolǵandyqtan, kúndelikti kıimmen júrdim», - dep jazdy qala meri. Onyń aıtýynsha, terrasada dostarymen ústel basynda otyrǵan kezde oǵan daıashy kelip «shalbarsyz júrgendikten, mekemeden shyǵyp ketýin suraǵan». Keshtiń basqa meıramhanada ádemi otyryspen aıaqtalǵandyǵyna qaramastan, mer oqıǵany kemsitýshilikke balaǵan.
The Club Nautico meıramhanasy bolǵan jaǵdaıǵa baılanysty keshirim surap, qala ákiminen ótemaqy retinde klýb múshesi bolýdy usyndy. Meıramhana basshylyǵynyń ókili Mýtsıo Skachıatı mekemeniń kireberisi men baspaldaǵy janynda mekemege kirýge ruqsat etiletin kıim úlgisi jaıly eki taqta ilinip turǵandyǵyn málim etti.
«Men bolǵan jaǵdaıǵa baılanysty keshirim surap, qala ákimimen ortaq til tabysa alatyndyǵymyzǵa senemin. Jáne oǵan klýbqa múshesiniń kartasyn syıǵa tartqym keledi», - dedi Skachıatı.
