Italııada Izraıl komandasyn basketbol matchyna qarsy aktsııamen qarsy aldy

ASTANA. KAZINFORM — Bolonıa qalasynda Eýrolıga 12-týry aıasynda «Vırtýs Bolonıa» men Tel-Avıvtiń «Makkabı» komandasy arasyndaǵy match aldynda Izraıl komandasyna qarsy narazylyq aktsııasy uıymdastyryldy, dep jazady Anadoly.

Búgingi matchqa deıin Bolonıadaǵy Madjore alańyna myńdaǵan adam jınalyp, halyqaralyq sport jarystaryna Izraıl komandalarynyń qatysýyna, sonyń ishinde búgingi «Makkabı» komandasynyń qatysýyna narazylyqtaryn bildirdi.

Ulttyq BAQ jarııalaǵan aqparat pen sýretterge sáıkes, narazylyq bildirýshiler «Izraılge qyzyl karta kórsetińiz» degen plakat ustaǵan jáne Gazada palestınalyqtarǵa genotsıd jasaǵan Izraıldi sporttyq jarystardan shyǵarýyn talap etti. Olar «Palestınaǵa bostandyq» dep urandady.

Qala kóshelerinde, ásirese Lame kóshesinde, keıbir demonstranttar men qaýipsizdik kúshteri arasynda qaqtyǵystar boldy.

Qaýipsizdik qyzmeti narazylyqqa sý búrikkishterdi paıdalanyp jaýap berdi, al keıbir demonstranttar qoqys jáshikterinen bógetter jasap, qoldarynda alaý-shamdar ustap qarsy turdy.

Osy oqıǵalardyń saldarynan keıbir kósheler «qalalyq shaıqas alańyna» aınaldy.

Sonymen qatar, 21 qarashada Mılanda Eýropa basketbol lıgasynyń EA7 Emporio Armani Olimpia Milano men Hapoel komandalary arasyndaǵy match aldynda Izraıl komandasyna qarsy narazylyqtar ótken bolatyn.

Osydan buryn Italııadaǵy ereýilderge 2 mln-nan astam adam qatysqany habarlandy. Kásipodaq qaıratkerleri, stýdentter, belsendi toptar men otbasylar Palestına týy men Izraıldi «basqynshylyqty toqtatýǵa» shaqyrǵan plakattar kóterip, eldiń túkpir-túkpirindegi qalalardaǵy tasjoldar men kólik toraptaryn jaýyp tastady.