Italııada er adam irimshik úıindisiniń astynda qalyp, mert boldy
MILAN. QazAqparat – Іrimshik qaınatatyn óndiris ornynyń ıesi, 74 jastaǵy Djakomo Kıapparını jeksenbi kúni Italııanyń soltústigindegi Romano-dı-Lombardııa qalasyndaǵy qoımada myńdaǵan irimshik úıindisiniń astynda qalyp, mert boldy, dep habarlaıdy QazAqparat VVS-ge silteme jasap.
Mılannan shyǵysqa qaraı shamamen 50 shaqyrym jerde ornalasqan qoımada 25 myńǵa jýyq parmezanǵa uqsaıtyn ári Italııada óte tanymal, qatty irimshik túri Grana Padano bolǵan.
Іrimshik qoıylǵan sórelerdiń biri qulaǵannan keıin árqaısysy shamamen 40 keli bolatyn myńdaǵan irimshik birinen keıin biri tómenge syrǵı bergen.
Qutqarýshylar er adamdy qutqarý úshin túnimen jumys istedi, biraq ony aman alyp shyǵý úmiti mınýt saıyn azaıa berdi. Úıindi astynan Djakomo Kıapparınıdiń denesin taýyp, shyǵarý úshin 12 saǵattan asa ýaqyt ketken.
Keı irimshikter 10 metr bıikten qulaǵan degen boljam bar.
Baǵalaýlar boıynsha, bızneske 7 mıllıon eýro (nemese 6 mıllıon fýnt sterlıng) shyǵyn kelgen, dep habarlaıdy Euronews.
Jergilikti polıtsııa oqıǵanyń jaı-japsaryn tergeýdi bastady.
