Italııada «demografııalyq» tótenshe jaǵdaı jarııalandy
ASTANA. KAZINFORM – Italıandyq áleýmettanýshylar men demograftardy eldegi halyqtyń qartaıýy jáne týý kórsetkishiniń tómendeýi qatty alańdatady. Kópshilik Djordjı Melonı úkimetiniń qoldanyp jatqan sharalary jetkiliksiz ári el jaqyn arada demografııalyq quldyraýǵa tap bolýy múmkin dep sanaıdy, dep habarlaıdy Euronews.
Sońǵy jyldary búkil Eýropada týý kórsetkishiniń tómendeýi baıqaldy. Bul másele ásirese Italııada ótkir bolyp otyr.
Elde týý kórsetkishi Eýropalyq Odaqtaǵy eń tómen kórsetkishke ıe. Buǵan qosa jergilikti turǵyndar qaýymdastyqtyń basqa elderine qaraǵanda áldeqaıda jyldam qartaıyp jatyr.
«Demografııalyq shuńqyrǵa» syrǵyp ketýdiń aldyn alý — Italııa úkimeti men «Italııa aǵaıyndylary» partııasy jetekshilik etetin basqarýshy koalıtsııanyń basty mindetteriniń biri. Biraq bıliktiń ádisteri, ásirese olardyń túsik jasatý týraly ázirlep otyrǵan zań jobasy áleýmettanýshylar men jergilikti úkimettik emes uıymdardyń synyna jáne kóptegen suraqtaryna sebep bolyp otyr.
Muny demografııalyq máselelerge arnalǵan Rımde ótken eki kúndik konferentsııa aıqyn kórsetti. Qatysýshylar elde «tótenshe jaǵdaı» ekenine kelisti.
Eger bul úrdis jalǵasa berse, 2030 jylǵa qaraı Italııanyń 59 mln halqy shamamen 1 mln adamǵa azaıady degen boljam bar.
Italııanyń Ulttyq statıstıkalyq basqarmasynyń (ISTAT) málimetinshe, eger 2022 jyly týýdyń jalpy koeffıtsıenti (ıaǵnı, bir áıelge shaqqandaǵy bala sany) 1,24 bolsa, bir jyldan keıin ol 1,2-ge deıin tómendedi.
Al halyqtyń qartaıýy zeınetaqy júıesi men densaýlyq saqtaý salasyna aýyr salmaq túsirip otyr.
«Italııadaǵy jaǵdaıdyń basty ereksheliginiń biri — daǵdarystyń uzaq jyldarǵa sozylýy. 2008 jyldan beri jańa týǵan náresteler sany 200 myńǵa azaıǵan. Kóp jaǵdaıda bul áleýetti ata-analar sanynyń azaıýyna baılanysty. Bul 30 jyl buryn bastalǵan týý kórsetkishiniń tómendeýimen túsindiriledi», — dep atap ótti ISTAT Bas dırektory Sabrına Pratı.
Ótken jyly el úkimeti áıelderge bala tárbıesi men jumysty qatar júrgizýge kómektesetin sharalarǵa shamamen 1 mlrd eýro bóldi.
Buǵan deıin habarlaǵanymyzdaı, Italııa parlamenti aldynda jınalǵan narazylyq bildirýshiler júktilikti toqtatý ortalyqtaryna ana máseleleri jónindegi keńesshilerdi engizýdi kózdeıtin jasandy túsik týraly zań jobasyn qabyldaýǵa qarsy.
