Italııada dástúrli apelsın «shaıqasy» aıaqtaldy
ASTANA. QazAqparat - Keshe Italııanyń Ivrea qalasynda júz jyldyq tarıhy bar apelsın shaıqasy aıaqtaldy. Tórt kún boıy ótkiziletin dástúrli oıynǵa shamamen 200 keli jemis jumsalady.
Jalpy, apelsın shaıqasy álemdegi jemis-jıdekterdiń «qatysýymen» ótetin sanaýly merekelerdiń qataryna kiredi. Atap aıtqanda, ıspandyq tomatına (pomıdor atysy), aǵylshynnyń kremi bar bálish laqtyrý jáne jumyrtqamen atysý festıvalinen keıingi tórtinshi orynda ıtalıandyqtardyń atalmysh merekesi tur.
Týrınnen 40 shaqyrym jerdegi Ivrea qalasynda ótetin bul mereke eýropalyqtardyń arasynda tanymal ekenin aıta ketken jón. Negizinde, merekeniń birneshe tarıhy bar. Sonyń biri jergilikti dıirmenshiniń Vıoletta esimdi qyzynyń erligimen baılanystyrylady. Ol ózi súımegen aqsúıekke turmysqa shyqpaý úshin qarsylyq kórsetken degen ańyz bar. Soǵan sáıkes, apelsın shaıqasyna qatysýshylar úsh topqa bólinedi. Qarapaıym jaýyngerler Vıolettany jaqtaýshylar, saýyt kıgen erler aqsúıekti qorǵaýshylar bolsa, úshinshi top qyzyl telpek kıgen adamdar erkindiktiń sımvoly retinde qatysady.
Qala basshylyǵy shaıqas kezinde kóshede kezdeısoq ketip bara jatqan adamdarǵa apelsın tıip ketpesi úshin festıval ótetin alańdy tormen qorshap tastaıdy. Ári oıynnyń sharty boıynsha apelsındi belgili bir adamǵa kózdep laqtyrýǵa bolmaıdy. Eń qyzyǵy, bul shaıqasqa kishkentaı balalarǵa da qatysýǵa ruqsat etilgen.
Buǵan qosa, apelsınnen bólek, festıvalde ystyq qyzyl sharap pen adamdar júretin jerge attyń qıy mindetti túrde shashylýy kerek eken, dep jazady Lenta.rý.
