Italııada bir táýlikte koronavırýstan kóz jumǵandar sany rekordtyq deńgeıge jetti
NUR-SULTAN. QazAqparat - Italııada koronavırýstan kóz jumǵandar sany ósti, dep habarlaıdy QazAqparat Euronews jańalyqtaryna silteme jasap.
Italııada sońǵy táýlikte 969 adam qaýipti dertten qaıtys bolǵan. Azamattyq qorǵanys departamentiniń málimetinshe, bul - pandemııa bastalǵaly bolǵan eń úlken kórsetkish. Onyń arasynda bir kún burynǵy statıstıkaǵa qosylmaı qalǵan 50 adam bar.
Italııada vırýs juqtyrǵandardyń jalpy sany Qytaıdaǵy kórsetkishten áldeqaıda asyp, 86 498 adamǵa jetti. Sońǵy táýlikte elde 4401 adam jańadan koronavırýsqa shaldyqqan.
Tótenshe jaǵdaı komıssary Domenıko Arkýrı Rımde ótken baspasóz konferentsııasynda medıtsınalyq materıaldardy jetkizýge áskerı kólik, onyń ishinde tikushaq tartylatynyn aıtty.
Joǵary densaýlyq ınstıtýtynyń málimetinshe, Italııada epıdemııa órshýi basylǵan joq, degenmen oǵan deıin az ýaqyt qaldy. Ony juqtyrý qarqynynyń báseńdegenine qarap bilýge bolady deıdi ınstıtýttaǵylar.
Qazirgi tańda qaterli indetti juqtyrǵandar arasynda 93 151 adammen AQSh kósh bastap tur. Biraq onda qaıtys bolǵandar sany az - 1382 adam.
