Italııada bir táýlikte koronavırýstan 800-ge tarta adam kóz jumdy
RIM. QazAqparat – Italııada sońǵy táýlikte koronavırýs ınfektsııasynan kóz jumǵandar sany kúrt ósti, indet 793 adamnyń ómirin qıyp ketti.Qaýipti vırýstan mert bolǵandar sany ol elde 4 825 adamǵa jetip otyr, dep habarlaıdy QazAqparat Bı-Bı-Sı aqparat kózine silteme jasap.
Dúnıejúzilik densaýlyq saqtaý uıymynyń málimetine súıensek, álem boıynsha bir táýlikte koronavırýs ınfektsııasyn juqtyrǵandardyń sany 32 myń adamǵa kóbeıip, 266 myǵa jetip qoıǵan. 11 myńǵa tarta kisi qaıtys bolǵan.
Djons Hopkıns ýnıversıtetiniń habarlaýynsha, tipti álemde koronavırýsty juqtyrǵandardyń sany 300 myńnan asyp ketken. Italııa beısenbi kúni-aq koronavırýstan bolǵan ólim-jitim boıynsha Qytaıdyń aldyna shyǵyp ketken edi. 22 naýryzdaǵy málimetke súıensek Covid-19 Italııadaǵy 53 578 turǵynnan tabylǵan. Bul 21 naýryzdaǵy kórsetkishten 6 557-ge artyp otyr. Koronavırýstyń eń úlken oshaǵy anyqtalǵan Lombardııada ınfektsııanyń taralýyna jol bermeý maqsatynda qatań sharalar qolǵa alyndy. Senbi kúni keshke jarııalanǵan jańa erejelerge sáıkes kóshede sportpen, dene mashyǵymen aınalysýǵa tyıym salynǵan. Saýda avtomattaryn paıdalanýǵa da shekteý qoıylǵan. Halyqqa eń qajetti taýarlardy sanamaǵanda bızneske barlyq operatsııany toqtatýǵa pármen berildi. Aýrýhana turǵyzýdan basqa barlyq qurylys jumysyn júrgizýge tyıym salyndy. Ashyq aspan astyndaǵy barlyq bazardyń jumysy toqtatyldy. Lombardııada koronavırýs ınfektsııasyn juqtyrǵannan 3 095 adam jan tapsyrǵan. Rımdegi eki monastyr karantınge jabyldy. Ondaǵy 59 monah áıel koronavırýs juqtyryp alǵan. Elde Covid-19 indetinen 28 din qyzmetkeri baqılyq boldy. Reseı senbi kúni koronavırýspen kúresý úshin Italııaǵa áskerı vırýsologtar men qajetti qural-jabdyqtardy jiberetinin jarııa etti.
