Italııada bir otbasynyń elektr qýatyna ortasha tólemi 59%-ǵa qymbattaıdy
BRıÝSSELЬ. QazAqparat - Italııanyń energetıka, jel jáne qorshaǵan ortany retteýshi Arera kompanııasy osy aptada elde elektr qýatynyń baǵasy taǵy ósetinin, bir otbasy úshin ortasha tólemaqy 59 paıyzǵa qymbattaıtynyn málimdedi, dep habarlaıdy QazAqparat tilshisi.
Italııa bıliginiń málimdeýinshe, energııa baǵasynyń ósýin tejeý úshin shuǵyl sharalar qabyldanbasa, baǵanyń ósýi 100%-dy quraıtyn edi. Bıyl el úkimeti energııa baǵasynyń kúrt ósýiniń saldaryn jeńildetý sharalaryna 60 mıllıard eýrodan astam qarjy bóldi.
Arera aımaqtyq dırektory Massımo Rıchchı Italııaǵa elektr energııasy úshin buryn-sońdy bolmaǵan aqy tólenetinin aıtty.
Italııanyń kelesi premer-mınıstri bolýǵa daıyndalyp jatqan Djordj Melonı energııa baǵasynyń ósýine qarsy kúreste ulttyq múddeni birinshi orynǵa qoıýǵa ýáde berdi.
Senbide ol Mılandaǵy aýylsharýashylyq jármeńkesinde fermerlermen sóılesip, ónerkásip pen aýyl sharýashylyǵyn energııa baǵasynyń kóterilýinen, sondaı-aq koronavırýstyq pandemııadan, ótken jazdaǵy rekordtyq aptap ystyq tolqynynan qorǵaıtynyn aıtty.
