Italııada batys nil qyzbasynyń 32 jaǵdaıy rastaldy

ASTANA. KAZINFORM — Bıyl Italııada keminde 32 adamnyń Batys Nil vırýsyn juqtyrǵany rastaldy. Olardyń kópshiligi (21 jaǵdaı) Rımniń ońtústiginen shamamen 100 shaqyrym jerdegi Latına provıntsııasynda tirkelgen, dep habarlaıdy Euronews.

Istituto Superiore di Sanità (ISS) beısenbi kúni jarııalaǵan aptalyq esepte «Epıdemıologııalyq úrdis aldyńǵy jyldarmen sáıkes keledi, biraq geografııalyq taralýy múlde ózgeshe» delingen.

Aýrý joǵary temperatýra, bórtpemen ótedi. Basqa jaǵdaılar Pemont, Veneto, Emılııa-Romanıa jáne Kampanııa óńirlerinde tirkeldi. Rastalǵan naýqastar arasynda eki adam kóz jumǵan: biri Fondı qalasynda, ekinshisi Novara provıntsııasynda.

— Batys nil vırýsy sońǵy birneshe jyl boıy elimizde endemııalyq bolyp sanalady. Barlyq qajetti shara qabyldandy, onyń ishinde qan quıý men aǵza transplantatsııasyna qatysty qaýipsizdik sharalary da bar. Aıta ketý kerek, vırýs juqtyrǵan jaǵdaılardyń 80 paıyzy sımptomsyz ótedi, al aýyr asqyný qaýpi eń álsiz toptar úshin joǵary, — dep málimdedi Infektsııalyq aýrýlar departamentiniń dırektory Anna Tereza Palamara.

Beısenbi kúni Latsıo aımaǵy vırýstyń oń nátıjesin kórsetken 12 jańa jaǵdaıdy rastady. Bul synamalar Rımdegi Spallantsanı ulttyq juqpaly aýrýlar ınstıtýtynda júrgizilgen.

Latsıo óńirindegi 21 jaǵdaıdyń quramyna kiretin jańa oqıǵalar Aprıllııa, Chısterna-dı-Latına, Fondı, Latına, Pontınııa, Prıverno, Setstse jáne Sabaýdııa qalalarynda tirkelgen.

ISS túsindirýinshe, batys nil qyzbasy (BNQ) — alǵash ret 1937 jyly Ýgandanyń Batys Nil aımaǵynda anyqtalǵan Flaviviridae tuqymdasyna jatatyn vırýstyń áserinen paıda bolatyn aýrý. Ol ataýyn dál osy aımaqtyń atymen alǵan.

Vırýstyń negizgi taratýshylary — jabaıy qustar men masalar (kóbinese Culex túri). Adamdarǵa ınfektsııa osy masalardyń shaǵýy arqyly juǵady. Adamnan adamǵa juǵý tirkelmegen.

Aıta ketelik Chıkýngýnıa vırýsy álemge taralyp jatqany týraly jazǵan edik.