Italııada Batys Nil bezgeginen 10 adam kóz jumdy
ASTANA. KAZINFORM — Italııanyń Latsıo aımaǵynda 93 jastaǵy áıel Batys Nil vırýsynan kóz jumdy. Bul eldegi on birinshi ólim jaǵdaıy boldy. Eýropada bul ınfektsııa bes memlekette tirkelip otyr, dep habarlaıdy Euronews.
93 jastaǵy áıel Rımdegi Spallantsanı juqpaly aýrýlar ınstıtýtynda kóz jumdy. Bul – jyl basynan beri Italııada tirkelgen onynshy ólim jáne Latsıo aımaǵynda rastalǵan tórtinshi jaǵdaı. Marqum Chısterna-dı-Latına qalasynyń turǵyny bolǵan. Ol aldymen Velletrı qalasyndaǵy San-Paolo aýrýhanasyna jatqyzylyp, keıin Spallantsanı ınstıtýtyna aýystyrylǵan.
30 shilde, sársenbi kúni taǵy úsh adamnyń qaıtys bolǵany habarlandy: olardyń biri — Salerno provıntsııasynan 76 jastaǵy er adam, ekinshisi — Kampanııadaǵy Kazerta qalasynda emdelgen Maddalonı turǵyny, 73 jastaǵy er adam. 29 shilde, seısenbide Latsıoda kóz jumǵan 86 jastaǵy naýqas birneshe qosymsha aýrýmen aýyrǵan jáne ol osy aımaqta tirkelgen alǵashqy juqtyrǵandardyń biri bolǵan.
Italııadaǵy Batys Nil bezgegine qatysty sońǵy málimetter
Italııanyń Ulttyq densaýlyq saqtaý ınstıtýtynyń 31 shildede jarııalaǵan sońǵy esebinde (86 jastaǵy er adamnyń deregin qospaǵanda) kelesideı málimetter keltirilgen:
2025 jylǵy 24–30 shilde aralyǵynda Batys Nil vırýsyn juqtyrǵan 57 jańa jaǵdaı tirkelgen;
El boıynsha vırýs juqtyrýdyń 89 rastalǵan jaǵdaıy bar (aldyńǵy bıýlletende – 32);
Olardyń 40-y neıroınvazıvti formada (Pemont – 2, Lombardııa – 1, Veneto – 3, Emılııa-Romanıa – 1, Latsıo – 23, Kampanııa – 10);
Qan donorlarynan anyqtalǵan 2 sımptomsyz jaǵdaı (Veneto – 1, Kampanııa – 1);
Bezgekpen ótken 46 jaǵdaı (Lombardııa – 1, Veneto – 5, Latsıo – 35, Kampanııa – 4, Sardınııa – 1);
Kampanııada tirkelgen taǵy bir sımptomsyz jaǵdaı;
Rastalǵan jaǵdaılar arasynda 8 adam qaıtys boldy (Pemont – 1, Latsıo – 2, Kampanııa – 5);
Qazirgi neıroınvazıvti formalar boıynsha ólim-jitim kórsetkishi 20% (2018 jyly da 20%, 2024 jyly — 14% bolǵan).
Batys Nil vırýsyn juqtyrýdyń alǵashqy jergilikti jaǵdaıy 20 naýryzda Pemonttaǵy Novara provıntsııasynda tirkeldi. Bul maýsymnan tys kezeńdegi oqshaý jaǵdaı bolǵan. Ekinshi jaǵdaı 3 shildede Modena qalasynda tirkeldi.
Eýropadaǵy jaǵdaı
Eýropa aýrýlardyń aldyn alý jáne baqylaý ortalyǵy beısenbi kúni Batys Nil vırýsyn juqtyrý jaǵdaılary týraly sońǵy málimetterdi jarııalady. Infektsııa Italııa, Grekııa, Rýmynııa, Bolgarııa jáne Frantsııada tirkelgen.
Vırýstyń 2025 jylǵy maýsymy bastalǵaly beri, 31-aptada alǵash ret Bolgarııa men Frantsııada (árqaısysynda bir aımaqta) 25 jergilikti ınfektsııa tirkeldi.
Aıta ketelik Italııada batys nil qyzbasynyń 32 jaǵdaıy rastalǵan edi.