Italııada avtobýs apatynan zardap shekken 2 qazaqstandyq aýrýhanada jatyr
Qazirgi ýaqytta túrli jaraqattarmen klınıkaǵa jetkizilgen qazaqstandyqtardyń ishinde 2 áıel aýrýhanada qaldy. Olardyń omyrtqa, qabyrǵa jáne buǵana súıekteri synǵan. Sondaı-aq kóp soqqy alǵan.
«Biz ıtalıandyq dárigerlerdiń sońǵy dıagnozyn kútýdemiz jáne oǵan sáıkes ári qaraı tıisti sharalar qabyldaımyz. Qalǵan 7 týrıst qonaq úıde. Olar óz ekskýrsııasyn ári qaraı jalǵastyrýy múmkin. Barlyq qazaqstandyq týrısterde medıtsınalyq saqtandyrý bar. Qazaqstandyq konsýl jaraqat alǵan otandastardyń janynda. Ol medıtsına qyzmetkerlerimen jáne jergilikti polıtsııamen kelissózde qajetti kómek kórsetýde. Jaqyn arada jaraqat alǵandardyń týystary Italııaǵa ushyp keledi» delingen habarlamada.
Italııanyń quqyq qorǵaý organdarynyń málimetinshe, avtobýs júrgizýshisi qamaýǵa alynyp, apatqa baılanysty tergeý júrip jatyr.
Eske sala keteıik, Italııada aýdarylǵan týrıster mingen avtobýsta Qazaqstannyń 9 azamaty bar ekenin osyǵan deıin habarlaǵan bolatynbyz.