Italııada aýa raıy kúrt jylynyp, jıdekter gúldeı bastady
ASTANA. QazAqparat - Italııada aýa raıy kúrt jylynyp, jıdekter gúldeı bastady. Tipti buryn-sońdy qys mezgilinde mundaı temperatýra bolmaǵan desedi.
Bıyl ózge jyldarmen salystyrǵanda ortasha eseppen 6 gradýsqa jylyraq bolyp tur. Al negizinen Italııada qańtar eń sýyq aı bolyp sanalady. Biraq eldiń ońtústik aımaqtarynda termometr +19 gradýsty kórsetip tur. Tipti keı jerlerde mamyrda búrshik jaratyn gúlder shyǵyp, jıdekter gúldeı bastaǵan.
Mamandardyń aıtýynsha, jyly qys birinshi kezekte aýylsharýashylyq ıelerine aıtarlyqtaı kesirin tıgizýi múmkin, dep jazady 24.kz.
- Bul jaǵdaı ýaqyt óte kele qalypty jaǵdaıǵa aınalmaq. Aldaǵy 100 jyldyq boljam boıynsha 2100 jyly Italııanyń soltústiginde aýa temperatýrasy 5 gradýsqa kóterilmek. Sondyqtan qazir bizge jyly bolyp otyrǵan qys bolashaqta úırenshikti bolyp ketedi, deıdi Italııanyń Qorshaǵan ortany qorǵaý ınstıtýtynyń qyzmetkeri Francheska Djordano.
