Italııada aptap ystyqtan tórt adam kóz jumdy
ASTANA. KAZINFORM—Italııada ekstremaldy aýa raıynan sońǵy eki kúnde tórt adam qaza tapty.
Jyly aýa tolqynyn Italııaǵa Afrıkadan Haron antıtsıklony ákeldi jáne boljamdarǵa sáıkes, ol shamamen shilde aıynyń sońyna deıin saqtalady.
Jergilikti baspasózdiń habarlaýynsha, Rımde sońǵy kúnderi aýa temperatýrasy Tselsıı boıynsha 38 gradýsqa jetken.
Kúnniń ysýy qazirdiń ózinde birneshe adamnyń ómirin qıdy. Sońǵy eki kúnde tórt adam qaıtys boldy.
Osylaısha, Apýlııanyń ońtústigindegi Barı mańyndaǵy Djovınatstso jaǵajaıynda 70 jastaǵy er adam esinen tanyp, qaıtys boldy. Rımde taǵy bir qart adam qaıtys boldy.
Italııanyń birneshe aımaǵynda joǵary temperatýraǵa baılanysty qyzyl deńgeı jarııalandy.
«Qyzyl aımaqta» 12 qala bar: Ankona, Bolonıa, Kampobasso, Florentsııa, Frozınone, Latına, Perýdja, Peskara, Rıetı, Rım, Trıest jáne Vıterbo.
Italııanyń Densaýlyq saqtaý mınıstrligi turǵyndar men týrısterge úıde bolýdy jáne suıyqtyqty kóp ishýdi usynady.
