Italııada alaıaqtar JI kómegimen mınıstrdiń daýysyn salyp, kásipkerlerden qomaqty qarjy alǵan

ASTANA. KAZINFORM – Italııada telefon alaıaqtary qorǵanys mınıstriniń daýysyn salyp, iri bıznesmender men korporatsııa basshylaryn aldap, qomaqty qarjy alǵan, dep habarlaıdy Euronews.

Eldiń birqatar eń dáýletti adamdaryna Gvıdo Krozetto men onyń seriktesteri atynan Gonkongtaǵy bank shotyna shamamen mıllıon eýro aýdarýdy suraǵan telefon qońyraýy tústi. Bul aqsha Taıaý Shyǵysta urlanǵan ıtalıandyq tilshilerdi bosatýǵa tólem jasaý úshin kerek degen syltaýmen suraldy.

Mılan prokýratýrasy tergeý júrgizip jatyr. Krozettonyń ózi X saıtyndaǵy jazbasynda «absýrdtyq» dep ataǵan oqıǵa seısenbide bastaldy.

- Maǵan ózime jeke tanys emes belgili kásipker habarlasqysy keletinin aıtty. Telefonmen sóılesken kezde ol buǵan deıin onymen men ózim, sosyn general habarlasqanyn jáne ol osy «general» bergen esepshotqa óte qomaqty aqsha aýdarǵanyn baıandady, - dep jazdy Krozetto.

Krozetto bul týraly polıtsııaǵa habarlady, karabınerler alaıaqtar qurbany bolǵan kásipkerdiń ótinishin qabyldady.

Mınıstr aıtqandaı, kelesi kúni dál osyǵan uqsas jaǵdaı bolyp, odan keıingi kúni alaıaqtar ózderin Gvıdo Krozetto dep tanystyryp, taǵy eki iri kásipkerden aqshany aldap almaq bolǵan.

Jalǵan mınıstrden qońyraý alǵandardyń tiziminde Pirelli basshysy Marko Tronkettı Provera, iri ınvestor Dıego Della Valle, dızaıner Djordjıo Armanı, Prada bas dırektory Patrıtsıo Bertellı, Ray Ban jáne Oakley-diń negizin qalaýshy Del Vekko men qurylys magnaty Franchesko Kaltadjırone otbasylary, sondaı-aq «Interdiń» burynǵy prezıdenti Massımo Morattı bar.

Alaıaqtar telefon qońyraýlary kezinde JI-men jumys isteıtin daýys fıltrin paıdalandy ma álde qorǵanys mınıstriniń jalǵan daýysymen aýdıo habarlama jazdy ma, ol ázirge belgisiz.

Kıberqylmyskerlerdiń jeke basyn anyqtaý úshin tergeýshiler alaıaqtar kórsetken bank shotyna salynǵan qarajattyń qaıda ketkenin anyqtap jatyr.

Italııada murajaıǵa kelgen áıel súrinip ketip, qundy kartınany búldirgenin jazǵan bolatynbyz.