Italııada Alkatras úlgisindegi túrmeler qaıta paıdalanyla bastaýy múmkin

Mundaı usynysty eldiń Іshki ister mınıstri Paola Severıno Parlament talqylaýyna shyǵardy.

«Interfaks-Kazahstan» málimdegendeı, bul shara eldiń kontınenttik bóligindegi lyq tolyp ketken túrmelerdiń máselesin sheshýge baǵyttaldy. Araldarda ornalasqan túrmelerge arnaıy kúzettiń qaraýyndaǵy uzaq jyldarǵa sottalǵan mafııalyq top ókilderin jiberý usynyldy.

Bul bastama qorshaǵan ortany qorǵaýshylar tarapynan qyzý qarsylyq týǵyzdy. Olar burynǵy túrmelerdiń ornynda tek qana qıraǵan úıindi qalǵanyn alǵa tarta otyryp, Úkimet adamdardy araldardaǵy tabıǵattyń taza da ádemi kórinisterine súısiný múmkindiginen aıyrmaý kerek dep málimdedi.

Aıta keteıik, Toskan arhıpelagynyń bir bóligi bolyp tabylatyn Pıanoza aralyndaǵy túrme XIX ǵasyrdyń ortasynda salynǵan. Ol jerge saıası tutqyndardy jer aýdarǵan. Al Sardınııa jaǵalaýyndaǵy Azınara aralynda ornalasqan taǵy bir túrmede Birinshi dúnıejúzilik soǵys kezinde avstrııalyq-vengrlik tutqyndar otyrǵyzylǵan. Qazir aral aq esek ósiriletin orynǵa aınaldy.