Italııada 20 qarashaǵa jalpyulttyq ereýil jarııalandy
ASTANA. KAZINFORM — Italııada 20 qarashaǵa jalpyulttyq ereýil jarııalandy. Mundaı sheshim ómir súrý qunynyń ósýine qarsy jappaı narazylyqtar aıasynda qabyldandy. 17 qazanda Mılan, Bolonıa jáne Týrın qalalarynda ótken sherýler polıtsııamen qaqtyǵysqa ulasqan. Bul týraly Kazinform agenttiginiń menshikti tilshisi habarlady.
Ereýil ótetinin Italııadaǵy eń iri kásipodaq birlestigi – CGIL jetekshisi Maýrıtsıo Landını málimdedi.
Rımde kásipodaq uıymdastyrǵan iri sherý ótti. Oǵan 100 myń adam qatysty. Olar jalaqyny kóterip, áskerı shyǵyndardy qysqartýdy talap etti. Sherý negizinen eleýli oqıǵalarsyz ótti.
Mılanda shamamen 5 myń adam qatysqan «Italia in piazza» sherýi alǵashynda beıbit sıpatta boldy. Alaıda keıin qara kıinip, bet-júzin jasyrǵan narazylyq bildirýshilerdiń bir bóligi quqyq qorǵaý organdarynyń qyzmetkerlerine shabýyl jasap, olarǵa tas, petarda jáne qorshaý bólshekterin laqtyrdy.
Qaqtyǵystar negizinen Dýomo soborynyń mańynda jáne oǵan jaqyn kóshelerde boldy. Polıtsııa kózden jas aǵyzatyn gaz ben sý atqysh mashınalardy qoldanyp, narazylyq bildirýshilerdi taratýǵa kiristi.
Qaqtyǵystar saldarynan dúkenderdiń vıtrınalary syndyrylyp, polıtsııa kólikteri búlindi jáne tonaldy. Aldyn ala málimet boıynsha, birneshe polıtsııa qyzmetkeri men jıyrmaǵa jýyq narazylyq bildirýshi zardap shekken. Olardyń basym bóligi jeńil jaraqat alǵan. Oqıǵaǵa qatysqan ondaǵan adam ustaldy.
Bolonıa qalasyndaǵy temirjol vokzaly mańynda da qaqtyǵys boldy. Polıtsııa sý atqysh mashınalardy qoldanyp, jeti adamdy ustady.
Italııa premer-mınıstri Djordja Melonı bolǵan oqıǵalardy aıyptady.
- Sherýge shyǵý – árkimniń quqyǵy. Al qalalarymyzdy urys alańyna aınaldyrýǵa jol berilmeıdi, - dedi ol.
Sondaı-aq premer-mınıstr oppozıtsııa ókilderin bolǵan jaǵdaıdy ashyq ári birjaqty aıyptaýǵa shaqyrdy.
