Italııada 18 qabatty úı tolyǵymen janyp ketti
MILAN. QazAqparat – Italııada Mılan qalasynyń ońtústik shetinde 18 qabatty turǵyn úıde órt tutanyp, ǵımarat tolyǵymen janyp ketti, dep habarlaıdy QazAqparat Reuters-ke silteme jasap.
Kýágerlerdiń aıtýynsha, 15-qabatta bastalǵan órt ǵımarattyń qaptamasy arqyly ishke jyldam taraǵan.
Órt sóndirýshilerdiń jumysyn kózdi ashytqysh tútin men qyzǵan qaptama bólshekteriniń jerge qulaýy qıyndatqan. Sondaı-aq jalyn ǵımarattyń mańyna turaqqa qoıylǵan birneshe avtokólikti sharpyǵan.
Órt saldarynan qaza tapqandar joq, alaıda birneshe adam tútinge tunshyǵyp, zardap shekken.
«Órttiń sebebi endi anyqtalady, jalynnyń ǵımaratty jalmaýy onyń termııalyq qaptalǵanynan bolýy múmkin», - dep málimdedi Rımdegi ishki ister mınıstrliginiń qyzmetkeri Karlo Sımba.
Ǵımarattyń qurylmasyn teksergen mamandardyń aıtýynsha, jaqyn arada ol tolyǵymen qulaýy múmkin, órt metall qańqaǵa edáýir zaqym keltirgen. Ǵımarattyń qulaýy kórshi úılerge de qaýip týdyrady, sol sebepti qutqarýshylar turǵyndardy evakýatsııalady.
