Italııada 13 myń jyl buryn plomba salynǵan tis tabyldy
ASTANA. QazAqparat - Italııa, Irlandııa jáne Amerıka ǵalymdary 13 myń jyldaı buryn plomba salynyp emdelgen tisterdi taýyp, olarǵa ǵylymı sıpattama berdi. Bul eń kóne stomatologııalyq shara jasalynǵan tister sanalyp otyr. Atalmysh ǵylymı eńbek American Journal of Physical Anthropology jýrnalynda jarııalandy.
Emdelgen tister birqatar kóne ańshy-terimshi jáne jer óńdeýshi men baqtashy adamdardyń qonystarynan tabyldy. Olardyń barlyǵy neolıt dáýirine ıaǵnı, adamdardyń tamaq óndirý jáne óńdeý tehnologııasyn jetildirgen kezine jatady (daqyldar men baldy jıi jegen), sol tusta tistiń aýrýlary da jıilep ketken.
Buǵan deıin mundaı kóne jádiger 2008 jyly Italııanyń Vıllabrýn qonysynan tabylǵan edi. Onda tisti tesken kezdegi iz saqtalǵan. Onyń jasy 14 160 nemese 13 280 jyl dep esepteledi. Alaıda tiste plombalaý baıqalmaǵan.
Bolon ýnıversıtetiniń qyzmetkerleri basqa da ǵylymı ortalyqtardaǵy áriptesterimen birlese otyryp qazirgi Toskannyń soltústigindegi Fredıan qonysynan tapqan qańqalarda, bir adamǵa tıesili eki tisinde emdeý belgileri baıqalǵan. Bul adam 13 myńnan 12 740 jyl buryn ómir súrgen.
