Italııa: Jerorta teńizinde 428 mıgrant qutqaryldy

NUR-SULTAN. QazAqparat – 428 zańsyz mıgrant mingen nemis SeaWatch3 gýmanıtarlyq kemesi aqyry Italııanyń ońtústigindegi Taranto portyna kirdi, dep habarlaıdy QazAqparat Euronews-ke silteme jasap.

Ótken demalys kúnderi eriktiler lyq toly úrlemeli qaıyqtardan Afrıka men Taıaý Shyǵystan kelgen júzdegen adamdy qutqardy.

Osydan keıin bosqyndar bir aptaǵa jýyq ýaqytty ashyq teńizde 40 gradýs ystyqta ótkizýge májbúr boldy. Olar Italııa bıliginen el porttarynyń birine kirýge ruqsat kútti.

Tek sońǵy birneshe aıdyń ishinde Italııanyń ońtústigindegi sý aıdyndarynan sýǵa batqan bes mıgranttyń denesi tabyldy. 2022 jyldyń birinshi jartysynda Italııaǵa teńiz arqyly 34 myńǵa jýyq adam kelgen. Bul ótken jyldyń osy kezeńimen salystyrǵanda 10 myńǵa artyq.

Biraq bári ózgerýi múmkin. 25 qyrkúıekte ıtalıalyqtar parlament saılaýynda daýys beredi. Eger ońshyl «Baýyrlas Italııa» partııasy bılikke kelse, elde baspana alý áldeqaıda qıyn bolýy múmkin.