Italııa jastary aýyl sharýashylyǵy salasyna bet burdy
ASTANA. QazAqparat - Italııa jastary aýyl sharýashylyǵy salasynyń tizginin ustaı bastady, dep habarlady www.24.kz.
Búginde eldegi 48 myń sharýashylyqty ýnıversıtetti keshe ǵana bitirgen túlekter basqaryp otyr. Bul Eýropadaǵy eń joǵarǵy kórsetkish. Úkimet kásibin endi bastaǵan sharýalardy qoldaý maqsatynda 6 mlrd eýro bólýdi josparlap otyr. Jahandy dendegen daǵdarys bul kúni bıznestiń baǵdaryn burýǵa túrtki bolyp tur. Máselen Italııada qazirgi tańda aýylsharýashylyǵy salasynan násip tapqan tıimdi. Sondyqtan bolar bul kásipke kelýshi jastardyń qarasy kún saıyn kóbeıip keledi. Denıs Karnello asqabaqtyń 30-35 tsentnerin jylyjaıdan jınaıdy. Mashaqaty kóp bolǵanmen turaqty tabys túsiredi. Aǵaıyndylar atalarynyń fermasyn turalatpaı, kásibi dóńgelengen sharýashylyqtyń qataryna qosty. Naryqta suranysqa ıe ónimderdi ósirip, Rımge jiberedi.
«Burynnan qalyptasqan qaǵıda boıynsha bul kásipti júrgizý múmkin emes. Jańa kózqaras, jańa bıznes ıdeıalar qajet. Qazir bul fermaǵa týrısterdi de qabyldaı alamyz. Salanyń qyr-syryn úıretip, kásipke baýlýǵa múmkindik bar. Úırenemin degenderge esigimiz ashyq», - deıdi kásipker Denıs Karnello.
Ynta men jiger kásip júrgizýdiń qozǵaýshy kúshi. Denıs sekildi onyń zamandastary qalada qalmaı, kóńilderi aýylǵa aýǵan. Óıtkeni bul baǵytta jumys isteý tabysty ekenine kózderi jetti.
«Bizdiń ata-analarymyz bir kezderi jaqsy turmys izdep, qalaǵa aýa kóshken edi. Qazir kerisinshe úrdis baıqalady. Jastar jappaı aýyldarǵa qonys aýdaryp, kásip ashyp, bıznesin júrgizýde. Bul jalpy elimizdiń ekonomıkasy damýyna serpin beredi», - dedi Coldiretti ulttyq agrarlar konfederatsııasynyń ókili Marııa Letıtsııa Gardonı.
Ónimdi sharýashylyqta óńdep, tutynýshyǵa tikeleı jetkizý. Bul qazirgi ýaqytta jas kásipkerlerdiń jumys isteý mehanızmi. Bılik bıznes bastaımyn degenderdiń betinen qaqpaıdy. Jaqsy jobasy bolsa qarjylandyryp, kásiptiń soqpaǵyna túsiredi.
