Italııa jappaı tártipsizdikke qatysqandar men tonaýshylarǵa jazany kúsheıtedi
ASTANA. KAZINFORM – Italııa Mınıstrler keńesi seısenbi kúni jappaı aktsııalar kezinde zorlyq-zombylyq pen vandalızmge qarsy baǵyttalǵan shuǵyl dekretti maquldady. Bul týraly Kazinform agenttiginiń menshikti tilshisi habarlaıdy.
Sheshim demalys kúnderi Mılan, Týrın jáne basqa qalalarda bolǵan tártipsizdikterden keıin qabyldandy. Onda negizinen jastardan quralǵan toptar dúkenderdiń áınekterin qıratyp, tonaýmen aınalysyp, quqyq qorǵaý organdarynyń qyzmetkerlerine shabýyl jasaǵan.
– Narazylyq bildirý – quqyq, al qalalarymyzdy qıratýǵa bolmaıdy. Biz bárimiz eshkim aqtaýǵa nemese mańyzyn tómendetýge tıis emes kórinisterdi kórdik, – dedi Italııa premer-mınıstri Djordja Melonı úkimet otyrysynan keıin jarııalanǵan beıneúndeýinde.
Jańa dekrette «jappaı tártipsizdikke qatysý» atty qylmys quramy engiziledi. Eger adam sherý nemese demonstratsııa kezinde bes nemese odan da kóp adamnan turatyn topqa qosylyp, tas, petarda nemese taıaq laqtyrsa, aınalasyndaǵylardyń qaýipsizdigine qater tóndirse, oǵan bes jylǵa deıin bas bostandyǵynan aıyrý jáne 20 myń eýroǵa deıin aıyppul salý jazasy qarastyrylǵan. Eger quqyq buzýshy betin jasyryp júrse nemese oqıǵa saldarynan basqa adamdar zardap shekse, jaza qatańdatylady. Top bolyp jasalǵan vandalızm úshin de jaýapkershilik kúsheıedi.
Dekrette «kim qıratsa, sol tóleıdi» qaǵıdaty bekitilgen. Eger zalaldy kámeletke tolmaǵan adam keltirse, jaýapkershilik onyń ata-anasyna júkteledi.
Qoǵamdyq múlikke, sonyń ishinde aıaldamalarǵa, baǵdarshamdarǵa jáne polıtsııa kólikterine zaqym keltirilgen jaǵdaıda, prefekt otbasyǵa tólem jasaý týraly talap jiberedi.
Al jeke menshikke – dúkenderdiń áınekterine, saýda oryndaryna nemese avtokólikterge zııan keltirilse, múlik ıesi sottan keltirilgen shyǵyndy óteý týraly dereý oryndalýǵa tıis tólem buıryǵyn ala alady.
Sonymen qatar buryn tek eresekterge qoldanylǵan aldyn ala ustaý sharasy endi 14–18 jastaǵy jasóspirimderge de qatysty bolady. Sondaı-aq kerisinshe dáleldenbese, jasóspirim óz áreketiniń sıpatyn túsindi degen prezýmptsııa engiziledi. Buǵan deıin parlamentte qaralǵan zań jobasynda bolǵan bul norma birden kúshine enedi.
Jyl sońyna deıin Mılanǵa qosymsha 500 áskerı qyzmetshi jiberiledi. Olar polıtsııa jáne karabınerlermen birlesip jumys isteıdi. Budan bólek, 16 jastaǵy jasóspirimderge de jaza mindetti túrde qoldanylýyn qamtamasyz etý úshin sýdıalar sany men kámeletke tolmaǵandarǵa arnalǵan mekemelerdegi oryndar kóbeıtiledi.
Djordja Melonı eshqandaı saıası ıdeıa nemese áleýmettik narazylyq dúkenderdi qıratý men urlyqty aqtaı almaıtynyn atap ótti.
– Qıratý men urlyq – narazylyq bildirýdiń túri emes, bul – qylmys. Memlekettiń jaýaby batyl bolýy kerek, – dedi ol.
Dekret birden kúshine enedi, alaıda zańda belgilengen merzimde keıin parlamenttiń maquldaýynan ótýge tıis.
Eske salaıyq, buǵan deıin Italııa Mılandaǵy tártipsizdikterge baılanysty 500 áskerı qyzmetkerdi jumyldyratyny habarlanǵan edi.
Al Frantsııada jappaı tártipsizdikterden keıin keı qalalarda komendanttyq saǵat engiziletinin habarlaǵanbyz.
