Italııa jaǵalaýynda zańsyz ımmıgranttar mingen qaıyq aýdarylyp qaldy
ASTANA. KAZINFORM – Jerorta teńiziniń Lampedýza araly mańynda mıgranttar mingen qaıyq aýdaryldy. Oqıǵa kezinde bir balanyń iz-túzsiz joǵalǵany belgili boldy. Qutqarý jumystary jalǵasyp jatyr, dep habarlaıdy Kazinform Anadolu agenttigine silteme jasap.
ANSA aqparat agenttiginiń habarlaýynsha, Italııa jaǵalaý kúzeti patrýldik qaıyqtar arqyly qutqarý operatsııasyn júrgizip, 64 adamdy aman alyp qaldy. Olardyń arasynda 14 áıel men 10 bala bar.
Oqıǵa kezinde Serra-Leone azamaty dep boljanǵan eki jasar bala teńizde joǵalyp ketken. Tóńkerilgen qaıyqtyń Týnısten shyqqany anyqtaldy.
Keıingi birneshe saǵat ishinde qutqarylǵan 64 adammen birge Lampedýza aralyna kelgen zańsyz mıgranttardyń jalpy sany 292-ge jetti.
Italııa Іshki ister mınıstrliginiń málimetine sáıkes, 2024 jyldyń basynan 13 naýryzǵa deıin teńiz arqyly elge kelgen zańsyz mıgranttardyń sany 5 174 adamdy qurady. Bul kórsetkish ótken jyldyń osy kezeńindegi 8 347 adamnan tómen.
Ortalyq Jerorta teńizi aımaǵy Italııa, Malta, Lıvııa jáne Týnıs arasyndaǵy zańsyz mıgratsııanyń negizgi baǵyttarynyń biri sanalady. Bul marshrýt arqyly Eýropaǵa ótetin mıgranttardyń alǵashqy qoný núkteleri – kóbinese Lampedýza araly men Malta.
Jyl saıyn kóptegen zańsyz mıgrant Jerorta teńizin kesip ótýge tyrysyp, qolaısyz aýa raıynan, qaıyqtardyń aýdarylýynan jáne t.b. jaısyz jaǵdaılardan japa shegedi. Bul jaǵdaı mıgratsııa máselesiniń kúrdeliligin kórsetedi.
Buǵan deıin habarlaǵanymyzdaı, Italııa ımmıgratsııalyq saıasatty kúsheıtip, teńiz blokadasyn engizdi.
