Italııa úkimeti álemdegi eń uzyn aspaly kópir jobasyn bekitti

ASTANA. KAZINFORM — Italııa úkimeti Apennın túbegin Sıtsılııa aralyna qosatyn álemdegi eń uzyn aspaly kópirdiń jobasyn maquldady, dep habarlaıdy AZERTADJ.

Jalpy uzyndyǵy shamamen 3,3 kılometr bolatyn kópirde árqaısysynyń bıiktigi 399 metr bolatyn eki tireý baǵanasy bolady. Jobanyń boljamdy quny — 13,5 mıllıard eýro.

Italııa premer-mınıstri Djordja Melonı kópirdi salýdy el úshin strategııalyq mańyzdy joba dep atady.

Óz kezeginde premer-mınıstrdiń orynbasary, kólik jáne ınfraqurylym mınıstri Matteo Salvını bul qurylystyń óńirler men búkil eldiń damýyn jedeldetetinin aıtty.

Bul ınfraqurylymdyq joba kóptegen ınnovatsııalardy qamtıdy jáne onyń júzege asyrylýy 6 jylǵa sozylady.

Infraqurylymnyń tutastyǵyn qamtamasyz etý maqsatynda 40 shaqyrymnan astam avtomobıl jáne temirjol joldarynyń qurylysy josparlanǵan.

Kópir Ońtústik Italııa men búkil eldiń damýyna strategııalyq mańyzy zor jáne transeýropalyq kólik jelilerin tolyqtyrý turǵysynan ulttyq mańyzǵa ıe bolady.

Aıta ketý kerek, bul joba Italııada 1960-jyldardyń aıaǵynan beri talqylanyp keledi.

Buǵan deıin Memleket basshysy Qasym-Jomart Toqaev Almatyda ıtalııalyq saýda úıin ashýdy usyndy.