Italııa úkimeti karantındi jeńildetý jónindegi qujatty bekitti
RIM. QazAqparat – Italııanyń Premer-Mınıstri Djýzeppe Konte koronavırýspen kúres maqsatynda Úkimet engizgen qatal karantın sharalaryn shetinen jeńildete túsý jónindegi Jarlyqqa qol qoıdy.
Bul týraly QazAqparat ItalııanyńANSA agenttigine silteme jasap habarlaıdy.
4 mamyr kúni elde ónerkásip óndirisi qaıta jandanady. Sonymen qatar saıabaqtar, qurylys alańdary men eksportqa taýar shyǵaratyn kásiporyndar jumysyn bastaıdy. Alaıda jumys berýshiler jumys ornyn muqııat dezınfektsııalap, jumysshylar ózara qaýipsiz ara qashyqtyqty saqtaýy kerek. Sondaı-aq tek maskamen ǵana jáne shaǵyn kólemde týystardyń úıine barýǵa ruqsat etiledi. Úlken otbasylyq jıyndarǵa burynǵysynsha tyıym salynǵan.
Konte sonymen qatar 4 mamyrdan bastap sportshylardyń da jekelegen sport túrleri boıynsha jattyǵýǵa kirise berýge bolatynyn aıtty. Degenmen komandalyq sport túrleriniń jattyǵýlaryna 18 mamyrǵa deıin tyıym salynady. Dúkender mýzeılermen jáne kitaphanalarmen birge jumysyn 18 mamyrdan bastaıdy.
Aıta keteıik, buǵan deıin tek azyq-túlik pen ózge de birinshi kezekte qajetti taýarlardy saýdalaıtyn dúkender ǵana jumys istep keldi. Barlar, meıramhanalar, shashtaraz ben sulýlyq salondary óz qyzmetin 1 maýsymnan bastaı alady.
Qoǵamdyq tamaqtaný oryndary 4 mamyrdan bastap, ónimderin jetkizip bere alady. Premer Konte mektepterdiń bıylǵy oqý jylynyń sońyna deıin jabyq bolatynyn aıtty.
Italııada qazir jerleý rásimin jasaýǵa ruqsat etildi. Aıta ketetin másele, úkimet shirkeý messasyn uıymdastyrýdy durys emes dep tapty. Óz kezeginde bul jaǵdaı Italııa Epıskop Konferentsııasynyń dinı ustanym boıynsha adam quqyǵynyń buzylǵany jónine shaǵym túsirýine negiz boldy. Konte sonymen qatar áleýmettik qashyqtyqty ustaný sharasynyń áli birneshe aı boıyna jalǵasatynyn eskertti.
Eske sala ketsek, Italııada koronavırýstan qaıtys bolǵandar sany Eýropadaǵy eń joǵary kórsetkish bolyp otyr. Sońǵy málimetter boıynsha, bul elde 26,6 myń adam kóz jumyp, 197,6 myń adam aýyrǵan. Soǵan qaramastan ınfektsııanyń taralý qarqyny tómendep keledi. Sonymen qatar kún saıyn qaıtys bolyp jatqandar sany da azaıǵan.
