Italııa taýlarynda myńdaǵan dınozavr izi tabyldy

ASTANA. KAZINFORM — Italııanyń soltústigindegi ulttyq saıabaqta myńdaǵan dınozavr izi tabyldy. Olardyń keıbireýiniń dıametri 40 sm-ge deıin jetedi. Ǵalymdar bul izderdiń paıda bolǵanyna shamamen 210 mıllıon jyl bolǵan dep eseptedi. Bul týraly VVS agenttigi jazdy.

Іzder bir-birine parallel ornalasqan. Olardyń kóbinde saýsaq pen tyrnaq tańbalary anyq kórinedi. Muny prozaýropodtar qaldyrdy degen boljam bar. Bul moıyny — uzyn, basy — kishkentaı, ótkir tyrnaqtary bar shópqorekti dınozavrlar.

Mılandyq paleontolog Krıshtıaný Dal Sasso ózi ómir súrip jatqan aımaqta mundaı jańalyqty kezdestiremin dep oılamaǵanyn aıtty.

Byltyr qyrkúıek aıynda áýesqoı fotograf Elıo Della Ferrera Mılannyń soltústik-shyǵysyndaǵy Stelvıo ulttyq saıabaǵynda tik taý baýraıynda júzdegen metrge sozylyp jatqan erekshe aıaq izderin baıqaǵan.

Trıas kezeńinde (shamamen 250-201 mıllıon jyl buryn) bul qabyrǵa jazyq bolǵan. Ol Alpi taýy tizbeginiń bir bóligi edi.

— Aýmaq dınozavrlarǵa toly bolǵan, bul úlken ǵylymı qazyna, — deıdi Dal Sasso.

Uzyndyǵy 10 metrge deıin jetetin prozaýropodtar eki aıaqpen júrgen, biraq keıbir jerlerde aldyńǵy aıaqtarynyń izderi de tabylǵan. Bul olardyń toqtap, aldyńǵy aıaqtaryn jerge qoıǵanyn kórsetedi.

- Bul jańalyq bárimizdi oılandyrdy jáne bizdiń planetamyz týraly qanshalyqty az biletinimizdi eske salady, - deıdi fotograf Elıo Della Ferrera.

Italııanyń Mádenıet mınıstrliginiń baspasóz qyzmeti izder jatqan aýdanǵa jetý qıyn jáne jaıaý barý múmkin emes ekenin habarlady. Sebebi ol jaqqa qaraı jol joq. Sondyqtan ony zertteý úshin drondar men qashyqtan zondtaý tehnologııalary qoldanylmaq.

Stelvıo ulttyq parki kelesi jyly qysqy Olımpıada oıyndary ótetin jerlerge jaqyn, Italııanyń Shveıtsarııamen shekarasyndaǵy Fraele alqabynda ornalasqan.

Eske salaıyq, zańsyz shyǵarylǵan dınozavr qaldyqtary Frantsııadan Mońǵolııaǵa qaıtarylady.