Italııa sýpermarketterge jasalǵan kıbershabýyldardy tergeýge arnaıy qyzmetterdi tartty
ASTANA. KAZINFORM — Italııa úkimeti sýpermarketterdiń tońazytqysh jabdyqtaryna jasalǵan birqatar kıbershabýyldan keıin arnaıy qyzmet basshylarymen shuǵyl keńes ótkizdi. Shabýyldar Eýropanyń keminde 11 eline áser etken. Bul týraly Kazinform agenttigi Euronews-ke silteme jasap habarlady.
Kıbershabýyl saldarynan Eýropalyq odaqtyń keminde on elindegi, sonyń ishinde Germanııa, Italııa jáne Nıderlandtaǵy sýpermarketterdiń tońazytqyshtary men muzdatqyshtaryndaǵy temperatýra kóterilgen. Sonyń saldarynan azyq-túlik buzylǵan. Osyndaı jaǵdaılar Ulybrıtanııada da tirkeldi.
Italııada shamamen 20 dúken zardap shekken. Úkimettiń málimetinshe, shabýyldyń saldary ázirshe aıtarlyqtaı emes. Aqaýlar negizinen qaýipsizdik júıeleri eskirgen saýda oryndarynda tirkelgen.
Osy oqıǵadan keıin Italııa mınıstrleri barlaý qyzmetteriniń basshylarymen jáne Ulttyq kıberqaýipsizdik agenttiginiń ókilderimen shuǵyl keńes ótkizdi. Agenttik saýda jelilerine jabdyqtardy qorǵaý jóninde usynymdar joldady.
Sıtsılııadaǵy Coop sýpermarketter jelisin basqaratyn toptyń dırektory Djýzeppe Spadaronyń aıtýynsha, kıbershabýyl jeliniń 300 dúkeniniń tórteýine áser etken. Temperatýra rejımi buzylǵandyqtan, azyq-túlikti tastaýǵa týra kelgen.
Eýropalyq odaq ókili Tomas Rene Eýropa agenttikteri birlesken áreket etý sharalaryn ázirleý úshin ulttyq bılik organdarymen baılanys ornatqanyn málimdedi.
Eýrokomıssııanyń azyq-túlik jáne aýyl sharýashylyǵy máseleleri jónindegi komıssary Krıstof Hansen bul oqıǵany azyq-túlik jetkizý tizbeginiń jumysyn buzýǵa baǵyttalǵan ádeıi jasalǵan áreket dep baǵalady.
Al alty dúkeni zardap shekken Rýmynııanyń Ulttyq kıberqaýipsizdik basqarmasynyń basshysy Dan Chımpean shabýyldardyń kásibı deńgeıde uıymdastyrylmaǵanyn aıtty. Onyń pikirinshe, bul iske memlekettik qurylymdardyń qatysy bar dep kúdiktenýge negiz joq.
Germanııada kıbershabýyl tórt dúkenge áser etken. Shvetsııada zardap shekken Coop jelisiniń jeti sýpermarketi jumysyn qalpyna keltirdi. Al eń kóp zardap shekken elderdiń biri Belgııada federaldyq prokýratýra tergeý bastady.
Aıta keteıik, sýpermarketterdiń tońazytqysh jabdyqtary qashyqtan baqylaý jáne tehnıkalyq qyzmet kórsetý úshin ınternetke jıi qosylady. Forescout kompanııasynyń zertteýine sáıkes, 99 elde tońazytqysh júıelerin basqarýǵa arnalǵan 13 myńǵa jýyq servıs ınternette ashyq tur.
Kıbershabýyldarǵa ázirshe eshkim jaýapkershilik alǵan joq. Qaskóılerdiń kózdegen maqsaty da belgisiz.
Eske salaıyq, buǵan deıin Belgııanyń federaldyq prokýratýrasy sýpermarketterdiń tońazytqysh júıelerine jasalǵan kıbershabýyldan keıin qylmystyq is qozǵaǵany habarlanǵan edi. Zardap shekken dúkenderdiń birinde shyǵyn keminde 60 myń eýroǵa, al ekinshisinde 100 myń eýroǵa deıin baǵalanǵan.